« enavos

Plattafurmas da trading – avertiment d'engion tar investiziuns da chapital

Tar la Polizia chantunala dal Grischun arrivan adina puspè denunzias da burgaisas e burgais ch'èn vegnids engianads tar fatschentas d'investiziun online presumtivas. Ultra da quai vegnan er persunas gia donnegiadas contactadas danovamain sut motivs fraudulents e surmanadas ad ulteriuras investiziuns.

Engianadras ed engianaders che ageschan professiunalmain creeschan en l'internet plattafurmas da trading stupentas che fan ina impressiun seriusa e laschan investir burgaisas e burgais en buna fai lur daners. Las «investiziuns» vegnan accumpagnadas da cussegliadras e cussegliaders d'investiziun presumptivs. I vegn carmalà cun investiziuns finanzialas lucrativas en aczias, en opziuns ed en criptomunaida. Persunas donnegiadas investeschan uschia plirs tschientmillis francs sin differents contos a l'exteriur. Uschespert che las funtaunas finanzialas èn exaustas, rumpa il contact.

Laschar surmanar danovamain da pajar daners

Malgrà ina denunzia penala vegnan bleras persunas donnegiadas adina puspè contactadas da las delinquentas e dals delinquents, e quai durant plirs onns. En intgins cas pretendan las delinquentas ed ils delinquents schizunt dad esser collavuraturas e collavuraturs da las autoritads da surveglianza da la Svizra e da la Germania e surmainan uschia las persunas donnegiadas da transferir danovamain daners. Betg darar capiti che las persunas donnegiadas recurran al chapital da pensiun resp. da provediment.

Protecziun cunter engion tar investiziuns da chapital

Avant ch'ins sa lascha surmanar ad investiziuns da chapital dubiusas, recumonda il Servetsch da cybercriminalitad da la Polizia chantunala dal Grischun d'observar il suandant:

• Renditas autas èn da natira colliadas cun ristgas da perdita autas
• Ristgas da perdita èn per il solit in bun pau pli realas che schanzas da rendita
• Far mo investiziuns da daners, sch'ins chapescha er quellas
• Discurrer cun persunas da confidenza u cun persunas spezialisadas da la branscha ordaifer il mund digital

Ulteriuras infurmaziuns pon vegnir consultadas sut cybercrimepolice.ch u sin la pagina da la Autoritad federala per la surveglianza dals martgads da finanzas.