Cun tge privels èsi da far quint durant il far notg?
La Polizia chantunala dal Grischun è stada activa il di naziunal da la protecziun cunter infracziuns. En ils dus centers da cumpra City West e Quader ha ella infurmà ils 2 da november – curt suenter il midament da l'ura – la populaziun davart las pussaivladads da prevenziun en il sectur da las infracziuns. Sch'i vegn numnadamain pli baud stgir e las abitantas ed ils abitants èn anc a la lavur, pon infracturas ed infracturs daventar activs.
Cun las persunas ch'èn vegnidas pledentadas da spezialistas e spezialist da la prevenziun hai dà discurs interessants. Il privel da daventar victima d'enguladitschs ord tastga e d'enguladitschs cun rampins, exista gea cunzunt durant il far cumissiuns. Intginas cussegliaziuns per la protecziun cunter infracziuns a chasa èn vegnidas reservadas directamain al lieu.
Made visible
Dus dis pli tard, ils 4 da november, hai puspè dà in'acziun al di naziunal da la glisch: durant la stagiun stgira è la ristga da far in accident sin via pli auta, en spezial per persunas ch'èn en gir a pe, cun il velo u cun il e-bike u cun in trottinet. Il post spezialisà Prevenziun è stà en gir en la Val dal Rain da Cuira ed ha sensibilisà persunas davart il tema visibilitad e segirezza.
In scolar che va la damaun baud a Domat cun il velo a scola, vegn controllà. Malgrà ch'igl è anc stgir, è el per via senza glisch davant e senza glisch davos. Il post spezialisà Prevenziun al regala ina glisch davant ed ina glisch davos demontabla, inclusiv la montascha. L'acziun "Made visible" è vegnida cuntinuada il november ed il december.
Eliminà mancanzas d'illuminaziun vi da vehichels
Il di naziunal da la glisch ha supplementarmain gì lieu in'acziun cuminaivla da la Polizia chantunala dal Grischun e dal Touring Club Svizra TCS. Las forzas d'acziun han controllà a Seewis Pardisla durant duas uras tut ils vehichels che gievan en direcziun Tavau sin mancanzas d'illuminaziun. Las bleras mancanzas da glischs sbassadas, da glischs da posiziun e da las illuminaziuns da numers han pudì vegnir reparadas al lieu. Ina contribuziun preziusa per la segirezza sin via.
