Per elavurar ses «Program chantunal d'integraziun» per ils onns 2024 fin 2027 (PCI 3) sa concentrescha il chantun Grischun sin in vast process participativ. Sut la devisa «Concepir ensemen» envida il Post spezialisà per l'integraziun a cooperar tar l'elavuraziun da las basas per la futura politica chantunala d'integraziun.

En sia sesida dals 19 d'october 2022 ha il Cussegl federal deliberà il credit d'impegn «Promoziun da l'integraziun (PCI 3) 2024–2027» per mauns dal parlament. Ussa èn dumandads ils chantuns. Fin ils 30 d'avrigl 2023 han els temp da fixar lur Programs chantunals d'integraziun (PCI 3). Cun quests programs mussan els, co ch'els vulan cuntanscher las finamiras da la politica d'integraziun definidas da la Confederaziun e dals chantuns.

La politica d'integraziun prenda per mauns las sfidas da l'entira societad

«Gist per il sectur da l'asil e da la migraziun è il temp actual fitg pretensius», uschia il cusseglier guvernativ Peter Peyer. Las cifras d'asil han per l'emprima giada puspè cuntanschì il nivel dals onns 2015/2016 – quest resultat na resguarda betg anc las var 70 000 persunas da l'Ucraina ch'èn fugidas en Svizra. Er l'ulteriura immigraziun per motivs sco lavur, famiglia, scolaziun e.u.v. da stadis da la UE/AECL e da terzs stadis è sin in fitg aut nivel.

Tant pli gronda impurtanza vegn il tema integraziun e convivenza ad obtegnair ils proxims onns. I vegnan a sa mussar sfidas da l'entira societad che surpassan per bler las pussaivladads d'agir da las autoritads. «Nus tuttas e tuts stuain ans engaschar, per che las fugitivas ed ils fugitivs sco er las persunas immigradas chattian uschè svelt sco pussaivel lur plaz en nossa cuminanza», uschia il cusseglier guvernativ Peter Peyer. Cun questa persvasiun è il chantun Grischun sa decidì per in vast process participativ sut la devisa «Concepir ensemen». En il barat cun la societad civila, cun las uniuns da migrantas e migrants, cun las organisaziuns dal mund da lavur, cun las vischnancas, cun ils posts da servetsch cumpetents e cun tut ils ulteriurs circuls interessads vegn il Post spezialisà per l'integraziun ad elavurar in Program d'integraziun progressiv ed innovativ per mauns da la Regenza.

Co pon ins sa participar?

Tgi che vul sa participar a l'elavuraziun da la politica chantunala d'integraziun, po annunziar ses interess fin ils 15 da december 2022 per e-mail a kip3@afm.gr.ch. Medemamain fin a questa data ed a la medema adressa pon vegnir inoltradas propostas tematicas concretas per projects d'integraziun, ideas, opiniuns e visiuns per sviluppar vinavant la promoziun chantunala da l'integraziun. Il schaner/favrer 2023 vegnan lura organisads plirs workshops tematics che sa basan sin questas propostas. Là vegnan las acturas ed ils acturs interessads respectivs ad empruvar d'elavurar ensemen ils tratgs fundamentals per il «PCI 3» dal chantun Grischun. Il resultat final vegn lura preschentà a la Regenza, la quala sto deliberar il «PCI 3» per mauns da la Confederaziun.

Ulteriuras infurmaziuns:

Explicaziuns davart ils secturs da promoziun sco er las finamiras da l'integraziun da la Confederaziun stattan a disposiziun sin la pagina d'internet dal Secretariat da stadi per migraziun.

Il «PCI 2bis» vertent dal chantun Grischun stat a disposiziun sin la pagina d'internet www.integration.gr.ch sut il tema Politica d'integraziun.

Infurmaziuns:

• Cusseglier guvernativ Peter Peyer, schef dal Departament da giustia, segirezza e sanadad, e‑mail Peter.Peyer@djsg.gr.ch
• Felix Birchler, Uffizi da migraziun e da dretg civil, manader dal Post spezialisà per l'integraziun/incumbensà chantunal d'integraziun. e-mail Felix.Birchler@afm.gr.ch