Persunas estras
La premissa per ina integraziun cun success è la voluntad e la prontezza da las persunas estras da s'integrar e da sa fatschentar en moda constructiva cun il mintgadi en Svizra e cun las usanzas localas e regiunalas.
En quest senn vegni pretendì da las persunas immigradas ch'ellas contribueschian lur part per garantir l'existenza, ch'ellas emprendian ina lingua naziunala, ch'ellas respectian l'urden social sco er ch'ellas observian las normas dal stadi da dretg.
Il confess general per ils princips democratics fundamentals, per la constituziun sco er per las valurs e per il progress social sco per exempel l'egualitad da dunna ed um, las schanzas da furmaziun per tuts, il dretg sin l'integritad corporala e la libertad da tscherner libramain sia partenaria u ses partenari è fundamental e na po betg vegnir negozià.
Organisaziuns da persunas estras
Persunas estras ch'èn immigradas da nov e che vegnan confruntadas en las modas las pli differentas cun lur conturns novs dovran sustegn. Cumpatriotas e cumpatriots che discurran la medema lingua e che han fatg experientschas sumegliantas èn savens mediaturas e mediaturs impurtants en il process d'integraziun.
Organisaziuns ed uniuns da persunas estras èn lieus da contact, nua ch'i vegnan furmadas raits socialas sco er barattadas experientschas ed infurmaziuns. Ellas surpiglian la funcziun da construir punts tranter la "veglia" e la "nova" patria e rinforzan la prontezza da las persunas novarrivadas da s'integrar.
Posts statals / structuras regularas
L'integraziun sco incumbensa principala statala e sociala sto vegnir observada da tut las autoritads en il rom da lur incarica da basa.
Pia sto la promoziun da l'integraziun avair lieu en emprima lingia en il rom da las structuras regularas existentas, sco en scolina, en scola, entaifer la furmaziun professiunala, sin il martgà da lavur, tar ils fatgs da sanadad, en las instituziuns da la segirezza sociala e.u.v.
I tutga tar las incumbensas da las structuras regularas d'accordar lur purschidas e lur activitads pli fitg cun ils differents basegns d'ina populaziun che daventa adina pli eterogena. En spezial duain vegnir iniziadas e finanziadas mesiras da promoziun sistematicas per gruppas da ristga ch'èn periclitadas da la desintegraziun.
Cun metter a disposiziun mesiras e purschidas da promoziun duai vegnir garantì a tut las persunas che han il dretg da pudair trair a niz questas mesiras – independentamain da lur derivanza sociala e naziunala – in access che porscha uschè bain sco pussaivel las medemas schanzas e las perspectivas correspundentas.
Acturas ed acturs betg statals
In punct decisiv per che la politica d'integraziun haja success è la participaziun d'acturas e d'acturs betg statals (economia, societad civila) al process d'integraziun.
Las organisaziuns da la societad civila (federaziuns, uniuns e.u.v.) èn in element purtant da la societad svizra. Sch'ellas èn avertas per persunas estras, permetta quai la participaziun tras contact e tras barat.
Er l'economia gioga ina rolla centrala. Sch'ils partenaris socials e las singulas interpresas s'engaschan per meglierar la situaziun da las migrantas e dals migrants sin il martgà da lavur, prestan els ina contribuziun impurtanta per lur integraziun.