Ti lavuras en l'uffizi per la segirezza da victualias e per la sanadad d'animals. Durant tes emprendissadi da 3 onns vegns ti a passentar supplementarmain trais giadas 3 mais en in grond labor d'emprendissadi extern e scolada/scolà là. L'ulteriur temp da tes emprendissadi roteschas ti en ils differents labors da l'uffizi.
Ti lavuras cun chemicalias, cun utensils, cun apparats da mesiraziun e cun differentas apparaturas. Ti planiseschas e fas experiments, surveglias lur process e fas evaluaziuns. Ti sas far sezza/sez simplas sintesas, inclusiv il nettegiament sco er la destillaziun. Ti enconuschas differentas metodas analiticas ed applitgeschas quellas en la lavur pratica.
La basa per la scolaziun manaschiala è – ultra da la promoziun da la part professiunala – il svilup da la cumpetenza metodica, sociala e persunala. Quai vul dir che ti t'acquistas durant tia scolaziun la savida e las enconuschientschas professiunalas da giudim ensi e che ti es en cas da dumagnar las pretensiuns en il sectur interuman e professiunal.
La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras. In pèr exempels:
- Curs da firmas e da federaziuns professiunalas sco er da l'associaziun per la furmaziun supplementara da las professiuns da labor
- Tecnicista/tecnicist da labor en scienzas natiralas cun diplom federal
- Analiticra biomedicinala/analiticher biomedicinal SSS dipl., tecnicista/tecnicist da textil SSS dipl., tecnicista/tecnicist SSS tecnica da sistem dipl.
- Bachelor of science (SAS) en chemia, bachelor of science (SAS) en biotecnologia, bachelor of science (SAS) en life science technologies cun approfundaziun en molecular life science u en life science technologies