Spezialista u spezialist ICT AFQ
Champ d'incumbensas
Ti lavuras tar l'Uffizi d'informatica u tar la Polizia chantunala a Cuira. Sco spezialista u spezialist ICT installeschas e configureschas ti ina vasta paletta d'apparats d'utilisaders finals, garanteschas che quels funcziunan en las infrastructuras da la rait ed instrueschas las utilisadras ed ils utilisaders davart l'applicaziun. Ti chapeschas svelt ils basegns da la clientella ed elavuras svelt las dumondas da l'uschenumnà 1st e 2nd level support. Latiers fas ti diever da proceduras definidas ed applitgeschas en moda segira il management da problems. Ti instrueschas e sustegnas las utilisadras ed ils utilisaders davart il diever dals meds ICT e lur applicaziuns da standard. Cumplementarmain preparas ti mussavias e glistas da controlla. Per chattar soluziuns en cas da problems tecnics specifics has ti in barat regular cun ulteriuras persunas spezialisadas dal manaschi.
Tias fermezzas èn
- In pensar abstract-logic
- L'abilitad da lavurar en in team
- Ina moda sistematica da lavurar
- Ina conscienza per ils servetschs
- In dun organisatoric
Accents da la scolaziun
Ultra da la scolaziun professiunala èn er la promoziun ed il svilup da la cumpetenza metodica, sociala e persunala parts impurtantas da tia scolaziun. Quai na ta gida betg mo a dumagnar las differentas pretensiuns sin plaun professiunal, mabain er sin plaun interuman.
Scolaziun
| Durada: |
3 onns |
| Scola: |
1-2 dis per emna scola professiunala
ca. 24 dis curs intermanaschials
|
| Finiziun: |
attestat federal da qualificaziun «spezialista/spezialist ICT AFQ»
|
Pretensiun
- Scola populara terminada
- Bunas notas en ils roms scienzas natiralas, matematica e linguas
Pussaivladads d'absolver furmaziuns supplementaras suenter l'emprendissadi
La furmaziun da basa professiunala è l'emprim pass impurtant per tes futur professiunal prosperaivel. Suenter ta stat a disposiziun in grond dumber da furmaziuns supplementaras, sco:
- Curs da scolas professiunalas e da scolas spezialisadas, da scolas autas, da differentas federaziuns professiunalas sco er da furniturs da soft- e da hardware
- Cun certificat professiunal federal: sviluppadra u sviluppader d'applicaziuns ICT, tecnicista u tecnicist da sistem e da rait ICT, spezialista u spezialist d'informatica economica, mediamaticra u mediamaticher
- Managera u manager ICT dipl., ICT security expert dipl.
- Scolaziuns en il sectur spezial informatica, p.ex. spezialista u spezialist d'informatica economica SSS, tecnicista u tecnicist d'informatica SSS ed auter
- Studis en il sectur spezial informatica, p.ex. bachelor SAS en informatica, bachelor SAS en informatica economica