Uffants ston emprender gia baud co sa cumportar correctamain sin via. Gist uschè impurtant è dentant che tut las autras participantas ed ils auters participants al traffic prendian resguard sin ils pli flaivels.

È quai era gia capità a Vus? In uffant curra suenter ad ina balla sin via u siglia tuttenina giu dal passape en via – e Vus pudais gist anc franar ad ura.

Uffants na pon savens anc betg valitar ils ristgs ed ils privels e ston l'emprim emprender co ch'il traffic sin via funcziuna. Prendai perquai spezialmain resguard:

• Tegnai perquai adina en egl uffants ch'èn datiers da la via.
• Adattai la spertadad e la moda da charrar e sajas pronta e pront per franar.
• Sajas spezialmain precauta e precaut en il conturn da scolas e quartiers d'abitar.

Uffants emprendan cun imitar auters. As cumportai perquai exemplaricamain.

Il cumenzament da la scola e la via da scola

Uffants duessan esser abels dad ir sulets la via da scola. Uschia rimnan els experientschas impurtantas: els fan amicizias, emprendan d'ir enturn cun conflicts e treneschan il cumportament correct en il traffic sin via. En l'instrucziun da traffic en scola emprendan ils uffants e giuvenils co sa mover a moda segira en il traffic.

Dapli davart l'instrucziun da traffic

Da mussar als uffants las enconuschientschas da basa dal traffic sin via e da trenar quellas en la pratica è dentant l'incumbensa dals geniturs e da las persunas cun represchentanza legala. Uschia mussais Vus a Voss uffant il cumportament correct sin e sper via:

• Laschai far Voss uffant sulet la via da scola a pe u cun velo.
• Preparai l'uffant: trenai cun el la via, mussai e declerai ad el situaziuns spezialas. Mussai er ad el dad adina prender la medema ruta.
• Procurai che Voss uffant vegnia vesì. Vestas da segirezza e parts reflectantas vi dal satgados u la vestgadira funcziunan bain.
• Tramettai Voss uffant senza squitsch da temp e hectica sin la via da scola. Uschia po el prender il temp da far stim dal cumportament correct e da privels pussaivels.
• Declerai e mussai a Voss uffant il cumportament correct en il traffic sin via.