Il dumber da dumondas d'asil inoltradas en Svizra è anc adina grond ed è puspè creschì fermamain l'onn passà. Il chantun prenda mesiras per garantir la collocaziun e l'assistenza da las requirentas e dals requirents d'asil e prenda en locaziun ina immobiglia a Litzirüti, vischnanca d'Arosa. 

La confederaziun ha attribuì al chantun Grischun l'onn 2014 totalmain 607 requirentas e requirents d'asil. Per l'onn current fa il secretariat da stadi per migraziun SEM quint cun maximalmain 31 000 dumondas. Al Grischun vegnissan pia attribuids passa 800 novas requirentas e novs requirents d'asil. Il contract da locaziun da l'immobiglia Schiabach a Tavau Plaz ch'è vegnida duvrada sco alloschi da reserva scada definitivamain ils 31 da mars 2016. Per garantir la capacitad d'alloschi vegn prendida en locaziun a partir dal 1. d'october 2015 a vista pli lunga la chasa da sport e da vacanzas Valbella a Litzirüti.

Cun quest nov alloschi sin il territori da la vischnanca d'Arosa duain vegnir dumagnadas las midadas extraordinarias dal dumber da requirentas e requirents d'asil attribuids al chantun. Quest center da transit vegn prendì en funcziun pir cur che tut ils auters alloschis collectivs dal chantun èn occupads cun requirentas e requirents d'asil ch'èn vegnids attribuids al Grischun. 
 

Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01
- Marcel Suter, manader da l'uffizi da migraziun e da dretg civil, tel. 081 257 25 21


Gremi: regenza
Funtauna: rg chanzlia chantunala dal Grischun