Persunas cun ina permissiun da dimora curta, ina permissiun da dimora ubain ina permissiun da domicil pon laschar examinar ina dumonda per ina reuniun da la famiglia per la dunna/l'um ed uffants nunmaridads sut 18 onns, premess ch'els abiteschian cun quels ed igl existian avunda meds finanzials. La reuniun da la famiglia sto vegnir fatga valaivla entaifer tscherts termins. Quests termins valan tant per la reuniun da conjugals sco per uffants. Ina reuniun da la famiglia posteriura vegn mo concedida, sche motivs famigliars impurtants pon vegnir fatgs valaivels.
Tar persunas cun ina dimora curta u la permissiun da dimora n'exista nagin dretg legal sin ina reuniun da la famiglia.
Confamigliars esters da Svizras e Svizzers u d'ina persuna cun ina permissiun da domicil han il dretg da survegnir ina permissiun da dimora en connex cun la reuniun da la famiglia, premess che las premissas sajan ademplidas. Era qua ston ins resguardar ils termins da reuniun.
Ins sto inoltrar:
- Il formular da dumonda B2 per la reuniun da la famiglia da persunas
- Il formular da dumonda B1 tar activitad da gudogn simultana da la persuna che vul entrar
- La conferma dal patrun dal petent davart in contract da lavur nunvisà cun inditgar il pensum da lavur
- Ils rendaquints da la paja dals ultims 12 mais dal petent
- Il contract da locaziun da l'abitaziun dal petent
- L'attest da lètg
- L’(Ils) attest(s) da naschientscha dal(s) uffant(s)
- L'extract dal register penal da la persuna che vul entrar
- L'extract dal register da las scussiuns actual ed original dal petent
- La communicaziun en scrit co, cura e nua ch'il petent ha emprendì d'enconuscher il petent
- L'offerta dad ina cassa da malsauns cun ina premia mensila ed ina franschisa da tut la famiglia
- La(s) copia(s) dal(s) pass da las persunas entrantas
L'enumeraziun precedenta n'è betg finida. L'Uffizi da migraziun e da dretg civil dal Grischun resalva il dretg en cas da basegn da dumandar per ulteriurs documents per la dumonda supplementara.
Quai vala era per petents cun gudogn independent.