La lescha dal dretg da burgais dal chantun Grischun enconuscha la natiralisaziun privilegiada per persunas svizras. Questa procedura sa differenziescha da la natiralisaziun ordinaria tranter auter perquai ch'i na ston vegnir ademplidas naginas premissas da domicil en la vischnanca da natiralisaziun. Plinavant fixescha il chantun Grischun definitivamain las premissas da natiralisaziun.

Fatgs da la vita privilegiants
Inoltrar ina dumonda per ina natiralisaziun privilegiada po quella persuna che:

• ha pers il dretg da burgais chantunal e/u communal tras relaschada u tras lescha;
• ha cartì durant 5 onns en buna fai d'avair il dretg da burgais d'ina vischnanca grischuna ed è effectivamain vegnida tractada durant quest temp da las autoritads chantunalas e communalas sco burgaisa da la vischnanca correspundenta; u
• porta il num da nubil d'in genitur che posseda il dretg da burgais communal tras derivanza.

Premissas
Las suandantas premissas ston vegnir ademplidas:

• nagina reputaziun penala turblada gravantamain
• adempliment da las obligaziuns finanzialas (p.ex. naginas scussiuns avertas)
• stretga relaziun cun il lieu da natiralisaziun (p.ex. dimoras da vacanzas)

Inoltraziun da la dumonda
La dumonda sto vegnir inoltrada cun il formular uffizial ensemen cun ils documents necessaris tar la vischnanca burgaisa anteriura u – sch'i na dat betg ina tala – tar la vischnanca politica anteriura.

Dretgs da burgais vertents
En intgins chantuns ha la concessiun dal dretg da burgais communal e chantunal per consequenza ch'ils dretgs da burgais vertents van a perder. Sche Vus avais dumondas en quest connex, As adressai per plaschair a l'autoritad cumpetenta dal chantun, nua che Vus possedais il dretg da burgais.