Vischnancas

Las vischnancas èn cumpetentas per la prevenziun primara da dependenza. Ellas pon delegar questa incumbensa er ad instituziuns publicas u privatas adattadas u a persunas privatas u l'ademplir en il rom da colliaziuns da vischnancas.

Las vischnancas promovan:

• l'infurmaziun da la populaziun areguard ils motivs e las consequenzas da la toxicomania e dal depurtament en dependenza;
• la conscienza e l'abilitad dals geniturs e da las persunas d'instrucziun d'empruvar d'evitar depurtaments che promovan la toxicomania tar giuvenils.

Chantun

L'uffizi da sanadad è cumpetent per la prevenziun primara en il sectur da dependenza. Qua chattais Vus infurmaziuns tar las persunas da contact da l'uffizi da sanadad.

L'uffizi dal servetsch social è cumpetent per la prevenziun secundara e terziara en il sectur da dependenza e cusseglia en dumondas da dependenza.

Program interchantunal da prevenziun e da diagnosa tempriva da la dependenza dal gieu per daners Svizra da l'Ost e Principadi da Liechtenstein – «Giugar senza dependenza»

Ensemen cun ils chantuns Appenzell Dadora, Appenzell Dadens, Glaruna, Son Gagl, Turgovia ed ensemen cun il Principadi da Liechtenstein ha il chantun Grischun concepì in program interchantunal da prevenziun e da diagnosa tempriva da la dependenza dal gieu per daners. En differents projects collavura l'uniun da la Svizra da l'Ost cun l'uniun da la Svizra dal Nordvest (chantuns Argovia, Berna, Basilea-Champagna, Basilea-Citad, Lucerna, Sursilvania, Sutsilvania, Soloturn, Uri e Zug).

Per quest intent èn cunzunt essenzialas la pagina d'internet www.sos-spielsucht.ch sco er il telefon d'agid per dependenza dal gieu 0800 040 080. La pagina d'internet duai promover la conscienza per la tematica dal gieu da fortuna e particularmain render attent a las ristgas da quel. Ultra d'infurmaziuns tranter auter davart in cumportament problematic en il gieu, cuntegna ella renviaments a tut ils posts chantunals da contact ed a tut las purschidas regiunalas da sustegn sco er a la purschida da cussegliaziun anonima e gratuita dal telefon d'agid.

Da las ulteriuras purschidas fan part fegls d'infurmaziun specifics per las gruppas en mira, campagnas da sensibilisaziun, documents per l'instrucziun, furmaziuns supplementaras, inscunters da colliaziun e sustegn da projects da perscrutaziun.