En vista als svilups da lunga durada ed impurtants per la societad, ils uschenumnads megatrends sco per exempel la transfurmaziun digitala, vegni partì dal fatg che la scola populara vegn a vegnir confruntada ils proxims onns cun incumbensas novas e multifaras. La dumonda principala è quella, co che nus sco societad vulain concepir la scola populara sut quest aspect en l'avegnir.

Cun il document da discussiun «Scola populara grischuna 2035 – incumbensas e perspectivas» metta l'Uffizi per la scola populara ed il sport a disposiziun ina basa, per reflectar davart il futur da nossa scola populara e per cooperar a ses ulteriur svilup. Propostas concretas per soluziuns e realisaziuns na stattan sapientivamain betg en il center. Il document da discussiun serva a reflectar davart la scola populara dal Grischun e preschenta las perspectivas respectivas en otg champs da svilup:

1. Ina scola per tuttas e tuts
2. Emprender per la vita
3. Scolaras e scolars emprendan cun success
4. Instrucziun innovativa e concepida professiunalmain
5. L'avegnir digital da la scola
6. Ina instituziun che sa sviluppa vinavant
7. La scola sco spazi da viver
8. Las persunas responsablas per l'educaziun sco partenarias da la scola