Sustegn per implants e per infrastructuras da sport
La Confederaziun ed il chantun Grischun sustegnan la construcziun e la renovaziun d'implants da sport en differentas modas e manieras.
Pussaivladads da sustegn
Per sustegnair il sport da dretg privat impunda il chantun Grischun meds finanzials dal fond da sport. La construcziun e la renovaziun d'implants da sport da federaziuns e d'uniuns vegnan sustegnidas cun contribuziuns dal fond da sport. La construcziun e la renovaziun d'implants da sport da federaziuns e d'uniuns vegnan sustegnidas cun contribuziuns dal fond da sport.
Ensemen cun l'Uffizi per economia e turissem è vegnì elavurà in Concept per implants da sport d'impurtanza chantunala (CISIC). Implants da sport d'impurtanza chantunala u regiunala pon vegnir sustegnids en il rom dal CISIC supplementarmain cun daners da la promoziun da l'economia.
Implants da sport d'impurtanza naziunala vegnan subvenziunads cun contribuziuns da la Confederaziun tenor il Concept per implants da sport d'impurtanza naziunala (CISIN).
Infurmaziuns davart la construcziun
Per infurmaziuns specificas architectonicas tar temas sco la funcziunalitad e la tecnica da construcziun, per dumondas da la planisaziun dal territori e da l'economia da manaschi sco er da la tgira e dal mantegniment d'implants da sport dispona l'Uffizi federal da sport d'in post spezialisà correspundent. Publicaziuns correspundentas, ulteriuras infurmaziuns sco er las persunas da contact respectivas chattais Vus sin la pagina d'internet da l'Uffizi federal da sport.
Utilisaziun optimala d'implants da sport en il chantun Grischun
Per ch'ils implants da sport en il chantun Grischun vegnian utilisads en moda uschè optimala sco pussaivel e satisfetschian als basegns da las gestiunarias e dals gestiunaris sco er da las utilisadras e dals utilisaders da hallas da sport (scolas, uniuns, persunas privatas), metta graubündenSport a disposiziun ils suandants documents.