In dumber da record da giuvenils frequenta il nov onn da scola il gimnasi, la scola da diplom e la scola media commerziala da la scola chantunala grischuna a Cuira. Mo cun il dumber augmentant da scolars daventa er la mancanza da spazi pli e pli evidenta.
1153 scolaras e scolars (30 dapli che l'onn passà) en 63 classas (plus 2) cumenzan quests dis in nov onn a la scola chantunala. Quai è in record. Anc mai han tantas persunas emprendì ed instruì quà. Il rectur Hans Peter Märchy persequitescha quest svilup cun in tschert quità, damai che las difficultads organisatorias s'augmentan en consequenza da la mancanza da spazi.

Mancanza da spazi sin tut ils secturs
Durant las vacanzas da stad han oravant tut ils dus planisaders dals uraris (conrectur Arnold Spescha e scolast da fisica Herbert Alder) gì da suar, fin ch'els han gì repartgì las lecziuns uschia sin las stanzas disponiblas ch'uraris pli u mains cuntentaivels èn resultads. Cun quità miran ils responsabels sin l'onn vegnent, nua ch'igl è da quintar pli probabel anc ina giada cun dapli scolaras/scolars e classas.
Anc pli gronda che tar las stanzas d'instrucziun è la mancanza d'ulteriurs locals. Qua mancan per gronda part locals plurivalents, stanzas per lavurs en gruppas, stanzas da preparaziun per las persunas d'instrucziun sco er plazs per ils scolars. Quai cumplitgescha l'introducziun da tschertas furmas d'instrucziun.
En consequenza da la refurma currenta da las scolas medias vegn la scola chantunala a stuair extender oravant tut sia spierta sin il sectur music; en las localitads ch'èn actualmain disponiblas na vegn quai betg ad esser pussaivel. Latiers vegn anc che la sanaziun adina puspè suspaisa da tut ils edifizis daventa inevitabla en il decurs dals proxims onns.

Grond basegn da cumpensaziun
La mancanza da spazi actuala è il resultat d'in svilup dad onns ed onns. 1967, cur che l'edifizi actual è vegnì planisà, frequentavan 748 scolaras e scolars la scola chantunala. Cur che las localitads novas èn vegnidas retratgas l'onn 1972 frequentavan gia 920 scolaras e scolars la scola. Il rectur da lez onn ha pudì scriver en ses rapport annual che la scola disponia uss da "relaziuns da spazi cuntentaivlas, dentant sajan las reservas calculadas gia consumadas."
En il decurs dals sequents onns è il dumber da scolars e da magisters s'augmentà cuntinuadamain. Plinavant han stanzas d'instrucziun stuì vegnir duvradas per installaziuns tecnicas sco per exempel per ils apparats d'informatica. Nov spazi n'hai dentant strusch dà, mo in paviliun cun quatter stanzas da classa è vegnì construì.

Votaziun dal pievel sco perspectiva allegraivla
In'emprima strivla d'argient al horizont è la votaziun chantunala dals 27 da settember: La revisiun parziala da la lescha da la scola media sco er la lescha davart la scol'auta professiunala da pedagogia (LSAP) èn fitg impurtantas per la scola chantunala. Sch'il pievel accepta domadus projects vegnan concentradas las scolaziuns professiunalas da las persunas d'instrucziun per la scolina, la scola primara sco er per lavurs a maun e dal tegnairchasa en las localitads da la scola da dunnas actuala en il Kantengut. Suenter in temps transitori stattan alur er ils edifizis che vegnan utilisads oz dal seminari da magisters al Plessurquai a disposiziun a la scola chantunala.
Quests lieus da scolaziun èn vegnids proponids d'ina cumissiun nominada dal departament d'educaziun ch'è s'occupada durant l'elavuraziun dals projects da scolaziun menziunads cun dumondas e soluziuns dal basegn da spazi. Experts d'ordaifer l'administraziun han examinà il rapport final da la cumissiun. Lur giudicament davart l'elecziun dals lieus proponids ha chattà in resun fitg positiv. En quest connex èn vegnidas accentuadas spezialmain las perspectivas a lunga vista cun las qualas ins duai surmuntar eventuals scenaris d'extensiun.
Gremi: departament d'educaziun, cultura e protecziun da l'ambient
Funtauna: rg gruppa da lavur per la lavur publica