Il dumber da dunnas ed umens sur 65 onns è s'augmentà considerablamain ils davos 20 onns. Correspundentamain è er s'augmentada la dumonda per plazs en chasas da vegls e da tgira. La planisaziun dal basegn dal chantun da l'onn 1994 ha quintà ch'i saja da crear apaina 700 plazs supplementars fin l'onn 2010.
Dapi questa davosa retschertga dal basegn è sa midada generalmain bainenqual chaussa sin il sectur da sanitad e spezialmain er pertutgant la politica d'attempads. Uschenumnadas furmas d'abitar cumplementaras, p. ex. abitaziuns d'attempads tgiradas u gruppas d'abitar pli pitschnas da tgira vegnan er promovidas pli intensivamain dal chantun. Plinavant è la spierta da spitex vegnida extendida per l'entir chantun. Tar ils attempads sezs esi da constatar ina midada da las valurs. L'entrada en ina chasa da vegls u da tgira succeda per ordinari pli tard che anc avant in pèr onns.
Las enconuschientschas actualmain disponiblas mussan ch'il basegn per novs plazs da chasas da vegls e da tgira dastgass esser pli bass che supponì anc avant quatter onns. En vista a questa situaziun ha il departament da giustia, polizia e sanitad disponì in moratori da planisaziun per la construcziun nova e l'amplificaziun da chasas da vegls e da tgira. Il chantun sistescha il tractament da projects da construcziun fin la terminaziun da la revisiun prevedida da la lescha per l'orientaziun nova da la politica chantunala d'attempads. Projects ch'èn gia approvads u che stattan avant l'approvaziun n'èn betg purtutgads da quest moratori. Exceptads èn medemamain quests projects da las furmas d'abitar cumplementaras.

Infurmaturs: -
Cusseglier guvernativ dr. Peter Aliesch, schef dal departament da giustia, polizia e sanitad, tel. 081-257 25 01 -
Tino Morell, manader da l'uffizi da sanitad, tel. 081-257 26 44

Gremi: departament da giustia, polizia e sanitad dal Grischun
Funtauna: rg departament da giustia, polizia e sanitad