Dieta dals 8-11 da settember 1999 a Gluorn/Glorenza
Enconuschentamain ha lieu il 1999 il 500avel anniversari da la battaglia da la Chalavaina sin il territori da cunfin tranter la Val Müstair ed il Vnuost. Las occurrenzas commemorativas han ins mess sapientivamain sut il motto "500 onns da convivenza", essend ch'ins ha vulì trair endament plitost las relaziuns tranter buns amis e vischins ch'èn creschidas en il decurs dals tschientaners che ils cuntrasts da lez temp.
In anè impurtant en la chadaina d'occurrenzas durant l'onn commemorativ furma il simposi scientific "Vischinadi tranter il Grischun ed il Tirol - Chalavaina 1499-1999" che ha lieu dals 8-11 da settember 1999 en la chasa-cumin da la pitschna citad istorica da Gluorn.
Questa dieta vegn organisada communablamain da l'institut cultural dal Tirol dal sid, l'archiv chantunal dal Grischun, l'universitad da Puntina (Innsbruck) e l'uniun grischuna per la perscrutaziun da la cultura. Ella duai sclerir ed actualisar ils fundaments istorics da la battaglia a la Chalavaina, ses effects sco er l'istorgia sociala, l'istorgia da l'economia, la baselgia, la cultura e l'art dal territori dal Grischun e dal Vnuost superiur sin la sava dal temp medieval al temp modern. Ultra da quai vegnan dentant er pledentadas las relaziuns actualas cun in sguard sin il proxim millenni. Cun ina visita guidada da spezialists vul ins plinavant dar invista en l'istorgia da la claustra da Müstair che cumpiglia pli d'in millenni.
Sco referents èn sa mess da disposiziun spezialists renumads che garanteschan ina preschentaziun cumpetenta da la tematica or da differentas perspectivas. I sa tracta da dr. Leo Andergassen, Brixen; dr. Mercedes Blaas, Damal/Puntina (Innsbruck); dr. Martin Bundi, Cuira; Claudio Gustin, Sta. Maria VM; dr. Christoph Haidacher, Puntina; lic. fil. Florian Hitz, Claustra/Turitg; lic. oec. Gottfried Hohenegger, Sta. Maria VM; dr. Julia Hörmann, Puntina; prof. dr. Rainer Loose, Tübingen; prof. dr. Werner Meyer, Basilea; prof. dr. Ulrich Pfister, Münster/Westf.; prof. dr. Guntram Plangg, Puntina; prof. dr. Josef Riedmann, Puntina; prof. dr. Roger Sablonier, Turitg; prof. dr. Hans Rudolf Sennhauser, Zurzach e prof. dr. Max Siller, Puntina. Ultra da quai ha lieu venderdi, ils 10 da settember ina saira commemorativa, durant la quala indigens da tuttas duas varts dal cunfin vegnan a raquintar da lur experientschas persunalas da convivenza sur ils cunfins ora.
L'occurrenza è publica, l'entrada è libra. Visitadras e visitaders èn bainvis. La dieta entschaiva mesemna, ils 8 da settember 1999 a las 10.00 en la chasa-cumin a Gluorn. Ils referents vegnan a sa stentar da preschentar lur temas en ina moda generalmain chapaivla.
Gremi: archiv chantunal dal Grischun
Funtauna: rg archiv chantunal