Las reproschas fatgas visavi la chasa da tgira Promulins a Samedan èn vegnidas scleridas a moda cumplessiva. En tscherts puncts duai schizunt in'inquisiziun penala dar scleriment final.
La stad 1997 han trais anteriuras collavuraturas fatg grevas reproschas en las medias cunter la cumissiun da la chasa da vegls da lez temp e sia moda e maniera da realisar la tgira ed assistenza dals abitants da la chasa, cunter l'incumpetenza da la tgirunza da partiziun, las mancanzas sin il sectur da la structura e la direcziun sco er en quai che reguarda las examinaziuns insuffizientas, fatgas en occasiun d'anteriurs eveniments en la chasa da vegls e da tgira.
Suenter differents scleriments preliminars (oravant tut discurs cun represchentants dals purtaders sco er cun anteriuras collavuraturas da la chasa da tgira) ha il departament da giustia, polizia e sanitad, observond sia obligaziun da surveglianza sco polizia da sanitad ed en cunvegna cun il circul d'Engiadin'auta, incumbensà la primavaira 1998 il team grischun per valitar la qualitad d'examinar las reproschas fatgas.
Il team grischun per valitar la qualitad ha discurrì tranter ils 18 da matg ed ils 30 da november 1998 cun il persunal e cun ils abitants da la chasa, cun las medias ed ils medis responsabels sco er cun collavuraturas e collavuraturs che na lavuran betg pli en la chasa da vegls e da tgira. Il resultat da l'examinaziun è vegnì formulà en in rapport ch'ins ha surdà ils 14 da december 1998 al departament da giustia, polizia e sanitad.
L'examinaziun dal team per valitar la qualitad ha fatg resortir ch'ina gronda part dals problems da la chasa resp. da las reproschas cunter la chasa sa basan sin las structuras dal 1991 che prevesan dus differents purtaders per la chasa da vegls e la chasa da tgira. Quests purtaders dubels han gì per consequenza che la surveglianza dal manaschi da la chasa n'è betg vegnida realisada a moda suffizienta resp. è vegnida delegada sin il sectur operativ. Ultra da quai èn collidadas duas differentas filosofias da tgira, e quai ha chaschunà la furmaziun da gruppas tar il persunal da tgira. Pervia da sia filosofia da tgira n'era ina part dal persunal betg abla da s'identifitgar cun il sistem da tgira sin basa d'ina persuna da contact ch'è vegnì introducì 1996 ed ha furmà uschia resistenzas, surpassond cumpetenzas ed ignorand directivas. Las mesiras concernent il persunal ch'ils purtaders, resp. la cumissiun cuminaivla da la chasa han alura ordinà han gì il resultat che trais anteriuras collavuraturas èn sa drizzadas a la publicitad.
Il sistem da tgira sin basa d'ina persuna da contact prevesa che mintga abitant e mintga abitanta ha ina persuna da contact entaifer il team da tgira ch'enconuscha mintgamai l'istorgia, la famiglia, las caracteristicas ed ils basegns, las malsognas ed ils giavischs da la persuna en dumonda. Questa persuna da contact planisescha la tgira, il decurs dal di, las activitads euv. ensemen cun la persuna tgirada, la famiglia e la media resp. il medi.
Il team per valitar la qualitad constatescha en ses rapport che las reproschas da las anteriuras collavuraturas en quai che reguarda la flaivlezza da manar dals posts surordinads sco er la mancanza da cumpetenza sociala da singulas persunas èn giustifitgadas. Oravant tut la manadra da partiziun incumbensada cun la realisaziun dal nov model da tgira era surdumandada tant en fatgs professiunals sco er organisatorics. En quai che pertutga las valitaziuns sbagliadas en la tgira ed assistenza da singuls abitants e singulas abitantas considerescha dentant il team per valitar la qualitad las reproschas fatgas da las trais collavuraturas sco exageradas e sco fatg che na pertutga betg l'entira chasa. Las mancanzas constatadas sin il sectur da la tgira èn en emprima lingia d'explitgar cun la chapientscha betg unitara da la tgira. Quai ha gì consequenzas sin la cuntinuitad da la tgira ed ha uschia chaschunà che la segirezza dals abitants n'era betg adina garantida.
A basa da las constataziuns dal team per valitar la qualitad e dal giudicament medicinal dal medi chantunal na po betg vegnir exclus en singuls cas l'existenza d'in cumportament relevant da dretg penal. Per sclerir ils fatgs ha il departament da giustia, polizia e sanitad inoltrà ina atgisa a la procura publica.
La procura publica vegn a decider a basa da sia valitaziun dals fatgs, sch'igl è eventualmain d'avrir ina procedura penala e per tge puncts.
Per eliminar las mancanzas constatadas sco er per garantir ina filosofia unitara da tgira recumanda il departament da giustia, polizia e sanitad als purtaders da la chasa da vegls e da tgira Promulins da consultar ina persuna spezialisada externa.
Per l'atun 1999 èsi previs ch'il team per valitar la qualitad fetschia in'analisa cumplessiva da las structuras e da l'organisaziun da la chasa da vegls e da tgira Promulins e rapporteschia alura al departament da giustia, polizia e sanitad.
Gremi: departament da giustia, polizia e sanitad
Funtauna: rg departament da sanitad dal Grischun