La regenza fixa ils centers da biro ed ils posts exteriurs per las tschintg regiuns da guaud ch'èn vegnidas creadas avant in onn. La nova repartiziun da las incumbensas tranter la centrala e las regiuns sco er aifer las regiuns vegn approvada.
En il rom da la nova organisaziun èn vegnids fixads ils centers da biro ed ils posts exteriurs sco suonda:

 

Regiun/ manader regiunal	Center	Posts exteriurs	Realisà fin	Remartgas
Surselva Arthur Sandri	Glion	Mustér	2003	Glion nov lavuratori
Val dal Rain/ Scanvetg Reto Hefti	Tamins	Maladers	2000
Signuradi/ Partenz/Tavau Gion Caprez	Schiers	-	2001
Grischun central/ Moesano Christian Barandun	Casti	Roveredo Andeer	2001
Grischun dal sid Markus Stadler	Zuoz	Vnà Valchava Puschlav	2002

La realisaziun e cun quai la retratga dals novs biros duai esser terminada l'onn 2003.
La nova repartiziun da las incumbensas vul en emprima lingia che las regiuns garanteschian d'ina vart l'assistenza da las vischnancas e possian furnir da l'autra vart spezialists cumpetents per ils secturs spezials: projects, privels da la natira, cussegliaziun da manaschis, protecziun da la natira en il guaud e guaud + selvaschina. Er la centrala (l'inspecturat forestal) vegn reorganisada. La direcziun vegn puspè reducida sin l'inspectur forestal e ses substitut e la repartiziun en secziuns duai vegnir substituida l'onn 2000 cun secturs specifics dal rom. Ina ulteriura incumbensa vegn ad esser quella da furmar ils andaments uschia, che la centrala vegn colliada cun las regiuns sur curtas vias.
L'introducziun en ils novs champs d'incumbensa ha lieu durant l'onn 2000, per ch'ins possia ademplir las novas responsabladads l'entschatta 2001.

La lescha d'energia vegn revedida
La lescha grischuna d'energia sto vegnir adattada al dretg federal superiur. Ultra da numerusas elavuraziuns redacziunalas èsi da menziunar sco novaziun materiala, ch'il quint per il stgaudament e l'aua chauda dependent dal consum duai vegnir abrogà per edifizis existents. El resta dentant per edifizis novs cun in stgaudament central e cun almain tschintg consuments da chalur. Ultra da quai vegni dà ina nova paisa a singulas mesiras da promoziun per edifizis publics, entant ch'i scrodan tut ils levgiaments da taglia che stattan en connex cun las mesiras per spargnar energia. La regenza suttametta al cussegl grond la missiva ed il sboz per ina revisiun parziala da la lescha d'energia sco er da l'ordinaziun executiva dal cussegl grond latiers. Il parlament vegn a tractar questa fatschenta probablamain durant la sessiun da mars 2000.

Ils centers regiunals d'intermediaziun da lavur obtegnan ina incarica da prestaziuns
La confederaziun ha laschà examinar la moda da funcziun e l'effect dals centers regiunals d'intermediaziun da lavur (CRIL) da tut ils chantuns. Il chantun Grischun ha obtegnì in bun resultat. Ma per l'entira Svizra han ins constatà ch'ins po meglierar anc bainquant cun mesiras adattadas. Per quest intent concluda la confederaziun cunvegnas da prestaziun cun ils chantuns. Questas cunvegnas cuntegnan cleras incaricas per ils CRILs. La regenza ha incumbensà il departament da l'intern e da l'economia publica da suttascriver la cunvegna correspundenta. Quai vegn fatg l'emprim per in onn d'emprova, durant il qual ins vul persequitar l'ulteriur svilup da l'incarica da prestaziuns. Sche la cunvegna na vegn betg desditga aifer quest termin, alur vala ella per trais onns.
La confederaziun vul meglierar l'execuziun da la lescha federala davart l'assicuranza da dischoccupads (LADI) e propona perquai ina revisiun da la LADI. En sia posiziun davart quest project ac-centuescha la regenza ch'i saja da sviluppar ina incarica da prestaziuns per las cassas, malgrà la gronda varietad da cassas. Questa incarica da prestaziuns duai meglierar la collavuraziun tranter las cassas publicas per dischoccupads ed ils ulteriurs posts executivs da la LADI. Malgrà la brisanza politica stoppian ins empruar cun tutta forza d'utilisar il potenzial da sinergias, dal qual ins na fa actual-main betg diever aifer la gronda part dals uffizis chantunals da lavur, e da spargnar uschia daners. Dal rest duai vegnir impedì, che las cassas da dischoccupads reduceschian lur prestaziuns da servetsch che n'èn betg mesirablas e che tras quai vegnia engrevgiada la collavuraziun cun auters posts executivs da la LADI.
Sa referind ad ina adattaziun sulettamain tecnica da la LADI che pertutga la posiziun dals organs executivs e la responsabladad ed indemnisaziun da quels, propona la regenza da desister en quest mument da la revisiun e da cumbinar quella cun la revisiun fundamentala da la LADI l'onn 2003.

La regenza reparta 428'400 francs or da la "taglia sin vinars"
Il retgav net dal chantun or da la taglia dal commerzi en detagl e da la vendita d'auas destilladas vegn impundida mintgamai a mesadad per intents d'utilitad publica e per la promoziun dal turissem. En favur d'intents d'utilitad publica vegnan mess a disposiziun 428'400 francs per differentas organisa-ziuns, instituziuns e per differents projects, tranter auter per chasas d'uffants e scolas-dimoras, organisaziuns ed instituts per impedids sco er per organisaziuns d'agid a sasez.

L'ordinaziun federala d'eveniments vegn sustegnida
Envers cusseglier federal Moritz Leuenberger prenda la regenza ina posiziun positiva pertutgant il sboz per ina ordinaziun federala d'eveniments (OEV). Las novaziuns han essenzialmain la finamira da crear, analogamain al traffic aviatic, in post d'inquisiziun indepenent per accidents en cas da gronds eveniments sin il sectur dal traffic public (inquisiziun ed evaluaziun da gronds e grevs ac-cidents, eveniments e da disturbis sin il sectur da las viasfiers, da la navigaziun sco er da las interpresas d'autos, da bus e da pendicularas). Pir in post d'inquisiziun per accidents ch'è independent da l'autoritad da surveglianza satisfa a las pretaisas d'independenza e da cumpetenza professiunala. La registraziun, l'inquisiziun e l'evaluaziun d'eveniments ch'èn relevants per la segirezza dal traffic public ston gidar en emprima lingia a prevegnir accidents. La regenza accepta il project da revisiun, renviescha dentant al fatg, ch'i dat anc intschertezzas concernent la collavuraziun tranter il post d'inquisiziun per accidents e las autoritads chantunalas da perquisiziun penala sco er concernent la scuntrada dals custs.

Da las regiuns e vischnancas
Il plan directiv regiunal Scanvetg, part protecziun da la cuntrada, vegn approvà cun resalvas.
La revisiun parziala da la planisaziun locala da Schlarigna vegn approvada cun resalvas, quella da Domat senza resalvas.
Per differents projects da construcziun da vias en il chantun vegnan dads libers credits d'in import total da 957'000 francs (direcziun dal project sviament da Roveredo, mantegniment da la galaria Trögli sin la A13c tranter Tusaun e Ziràn sco er mantegniment e schlargiament da la punt tranter S. Martin e Val S. Pieder).
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun