L'excursiun da las pensiunadas e dals pensiunads da quest onn organisada da l'uniun dal persunal chantunal grischun ha manà al Lai da Constanza. Cun in'aura grondiusa ed ina luna gist uschè buna han ils participants giudì in viadi da pliras uras sin la nav d'admiral "Son Gagl" da la societad svizra per la navigaziun sin il Lai da Constanza.
Ins ha duvrà tschintg cars per conducir il grond dumber da 208 persunas da Cuira e Landquart tras la Val dal Rain a Romanshorn TG. Las pensiunadas ed ils pensiunads ils pli giuvens èn var 60 onns, il pli vegl ademplescha 100 onns quest onn. Blers sa conuschan bain da lur temp cuminaivel tar il chantun. Ins ria e fa sgnoccas, ins dà dal ti, tuttina sch'ins è in ex-vier, in ex-directur da scola u in ex-cusseglier guvernativ.

In'aua sco en la Caribica
Sin il cuntschet a la riva dal lai a Romanshorn vegn la legra cumpagnia beneventada dal chapitani e da sia squadra. Prest èn tuts installads en las quatter grondas salas da la bartga da passa 50 meters lunghezza, nua che las maisas èn pinadas e spetgan ils giasts. La damaun avevi anc pluì en il Grischun, ma gia curt avant mezdi malegian il sulegl ed ils nivels partents las pli bellas culurs sin la vasta surfatscha dal Lai da Constanza. Intgin constatescha schizunt che l'aua glischenta en tut las variaziuns dal blau stgir fin al blau cler fa endament la Caribica.

Viver vul dir sa midar
Cur che las emprimas bavrondas vegnan servidas s'augmenta il nivel da la discussiun evidentamain. Tuts han bler da quintar e natiralmain ch'ins sa perda en las regurdientschas. Pli baud cur ch'i na dava anc nagin computer e cunzunt nagin internet, regnava anc in clima famigliar e main hectic en l'administraziun. Che las bleras midadas fetschian per part tema, audan ins adina puspè. Il temp sa mida spert e viver vul dir s'adattar permanentamain a las midadas ed er furmar quellas. Ma quai duain far uss ils giuvens.
Il viadi maina da Romanshorn per lung da Kreuzlingen e Constanza fin Meersburg e pia en Germania fin Immenstaad e Friederichshafen, nua ch'i penda in zeppelin alv a l'orizont, per turnar da là davent al port da partenza. Trais uras e mez viadi en bartga passan sco il vent. La schuppa da giutta, il schambun, il gratinà da tartuffels ed ils legums sco er la buna turta da glatsch èn prest mangiads. Tar il cafè datti anc ina lottaria, dus curts discurs e musica da bal sin la punt mesauna dal bastiment.

In port impostant
L'arriv a Romanshorn è impressiunant. Quest lieu posseda il port il pli grond dal Lai da Constanza. Il port è il medem mument la patria da la flotta svizra dal Lai da Constanza. L'emprim implant è vegnì construì tranter ils onns 1842 e 1844 dal chantun Turgovia. Orasum il cuntschet dal port è vegnì construì lezza giada in clutger cun zains che permetteva da segnar il port cun tutgar ils zains en cas da tschajera. Gia tranter ils onns 1853 ed 1856 han ins stuì engrondir il port per dapli che sis giadas sin 74'000 m2. Gronds magasins dattan anc oz perditga dal grond traffic internaziunal da rauba ch'ha procurà qua durant passa in tschientiner per ina vita spir fatschegn. La fin da la segunda guerra mundiala han las flottas tudestgas ed austriacas tschertgà ricover en il port da Romanshorn per na betg vegnir destruidas.

Excursiun da giubileum 2000
En il batschigl dal port nodan differents utschels da l'aua, er intginas sfunsellas da la cresta. Quellas sa nutreschan en emprima lingia da peschs, san ir sut aua fin 40 meters profunditad e restar sut aua pli ch'ina minuta. Ellas na s'occupan betg dal grond dumber da Grischunas e Grischuns che descendan da la bartga a motor Son Gagl e muntan en ils bus che spetgan. La gruppa illustra da pensiunadas e pensiunads vegn a returnar en il Grischun viagiond sur il Toggenburg. Cun quai terminescha il viadi da giubileum 2000 da las pensiunadas e dals pensiunads. L'excursiun da giubileum perquai ch'ella è vegnida organisada quest onn per la 25avla giada. L'uniun dal persunal chantunal grischun UPC l'ha organisada cun il sustegn finanzial da la regenza e da la chascha chantunala da pensiun. Bleras impressiuns, bels inscunters e discurs vegnan anc ditg a resunar. Nevaira, en in onn essan nus puspè da la partida!

Gremi: uniun dal persunal chantunal grischun
Funtauna: rg chanzlia chantunala dal Grischun