La cumissiun predeliberanta dal cussegl grond ha tractà sut il presidi da deputà Lorenz Zinsli (Cuira) ed en preschientscha dal president da la regenza Peter Aliesch sco er dals represchentants da l'administraziun la missiva tar la lescha davart ils automats da gieu ed ils manaschis da gieu. La cumissiun predeliberanta dal cussegl grond ha laschà infurmar en il casino ad Arosa davart in manaschi en ina sala da gieu existent ch'è innovativ e che funcziuna bain. Latiers han er appartegnì orientaziuns davart il gieu da boule, la differenza tranter automats da gieu da fortuna e d'inschign, las novaziuns da la lescha federala davart las bancas da gieu, las mesiras da segirtad en ina sala da gieu sco er las mesiras da protecziun encunter consequenzas nuschaivlas dal manaschi da gieus.
La cumissiun predeliberanta ha stuì prender per enconuschientscha che l'ordinaziun previsa dal cussegl federal tar la lescha federala davart las bancas da gieu e l'imposiziun da taglias tras la confederaziun vegn a purtar grevezzas supplementaras considerablas per las salas da gieu. Ella tema perquai che l'existenza da quests manaschis ch'èn impurtants per il turissem da noss chantun sajan periclitads ed ella spetga ch'il cussegl federal tegnia sias empermischuns per il turissem e creeschi cundiziuns generalas favuraivlas per las bancas da gieu en ils territoris turistics. En favur da l'aboliziun dal scumond da las bancas da gieu l'onn 1993 aveva il cussegl federal argumentà tranter auter er cun il fatg ch'exempels en l'exteriur hajan mussà che las bancas da gieu sa sviluppeschian ad instituziuns attractivas per il turissem. Lur admissiun vegnia a meglierar senza dubi l'attractivitad da noss lieus da cura, rinforzar la posiziun dal turissem svizzer ed a dar impuls positivs a favur da l'economia regiunala. Cun las tariffas da taglia èn uss dentant er periclidadas en lur existenza las salas da gieu existentas sco quellas ad Arosa, Tavau e San Murezzan. Ulteriuras na duain betg vegnir permettas pli en il chantun Grischun tenor l'avis dal cussegl federal. Tenor las directivas per la surdada da concessiuns per bancas da gieu per mauns da la cumissiun per bancas da gieu planisescha il cussegl federal da limitar il dumber da las bancas da gieu da la categoria A (Grand Casinos) a totalmain quatter fin otg e quel da la categoria B (salas da gieu) a maximalmain 15 fin 20. Sin fundament da la repartiziun regiunala duai vegnir permess nagin Grand Casino e be dus fin trais salas da gieu en il chantun Grischun. Tenor l'avis da la cumissiun predeliberanta n'ha il cussegl federal betg tegnì pled cun questas directivas. La finala na portan talas directivas da la confederaziun betg mo nagina promoziun economica, mabain ellas pericliteschan l'existenza dals manaschis innovativs e qualitativamain buns che gidan ad augmentar l'attractivitad da las vischnancas dal lieu e dal turissem grischun che porschan diversas plazzas da lavur. La cumissiun predeliberanta pretenda perquai dal cussegl federal da reponderar la tenuta da fin uss. Ella vegn er a proponer al cussegl grond d'inoltrar ina resoluziun al cussegl federal.
Cun la lescha chantunala davart ils automats da gieu ed ils manaschis da gieus ch'è vegnida tractada da la cumissiun predeliberanta vegn creada la basa per incassar ina taxa da bancas da gieu tenor las disposiziuns da la lescha federala davart las bancas da gieu. Il medem mument vegnan cumpigliadas en ina lescha tut las disposiziuns chantunalas davart la polizia da gieus, il manaschi da gieus ed ils automats da gieus. Plinavant èsi previs da permetter automats d'inschign en salas da gieu da dretg chantunal e da surdar a las vischnancas las cumpetenzas da relaschar disposiziuns davart ils locals da gieus cun automats da gieus da divertiment.
Tant la dumonda d'entrar en chaussa sco er la concepziun da la revisiun n'èn pli u main betg vegnidas contestadas en la cumissiun predeliberanta dal cussegl grond. Da discussiunar ha dà spezialmain la dumonda da destinar la taxa da las bancas da gieu a favur da las vischnancas dal lieu u per il turissem e per intents d'util public.
La revisiun è ina consequenza dal scumond da las bancas da gieu ch'è vegnì abolì 1993 dal pievel svizzer. La lescha federala davart las bancas da gieu che va en vigur il 1. d'avrigl 2000 permetta Grand Casinos e salas da gieu e pussibilitescha a la confederaziun d'incassar da quests manaschis ina taxa da banca da gieu. Per salas da gieu incassescha la confederaziun la taxa en l'autezza cumplaina, sch'il chantun n'incassescha betg ina taxa correspundenta. Cas cuntrari vegn la taxa dentant reducida per l'import da la taxa chantunala. Questa regulaziun n'ha per consequenza naginas taxas u grevezzas supplementaras per las salas da gieu, mabain ella ha l'effect che las entradas tranter la confederaziun ed il chantun vegnan repartgidas.
Il sboz da la lescha vegn tractà dal cussegl grond durant la sessiun da schaner. Il pievel vegn a decider en chaussa ils 21 da matg 2000.
Gremi: cumissiun predeliberanta dal cussegl grond
Funtauna: rg cumissiun predeliberanta dal cussegl grond