La regenza grischuna è encunter l'abrogaziun da la taglia sin la valur da l'atgna fittanza.
En sia posiziun per mauns dal departament federal da finanzas s'exprima la regenza encunter l'abrogaziun da la taglia sin la valur da l'atgna fittanza. Ina tala midada dal sistem avess per consequenza perditas da taglia massivas per il chantun e per las vischnancas e na promovess betg la proprietad d'abitar.
La valur da l'atgna fittanza cuntegna quel import ch'il proprietari pudess cuntanscher, sch'el fittass sia atgna chasa ad ina terza persuna enstagl da la duvrar per sasez. La valur da l'atgna fittanza è in retgav da facultad immovibla ed è suttamessa uschia a la taglia sin il gudogn. Il departament federal da finanzas ha inizià ina prodedura da consultaziun davart l'abrogaziun da la taglia sin la valur da l'atgna fittanza ed ha envidà tranter auter er ils chantuns da prender posiziun.

Or da la vista da la politica da finanzas n'è questa abrogaziun betg da responsabiltar
En il cas d'ina midada per propi dal sistem, q.v.d. en cas che la taglia sin la valur da l'atgna fittanza vegniss abrogada ed il medem mument vegnissan stritgadas las deducziuns per ils custs da mantegniment ed ils tschains da daivets, cuntanschessan il chantun e las vischnancas entradas da taglia da mintgamai var 30 milliuns francs pli bassas. Mo ils proprietaris da segundas abitaziuns chaschunassan perditas da taglia da mintgamai 20 milliuns francs. En vista a quests fatgs pari a la regenza ch'ina midada dal sistem na saja betg da responsabiltar or da la vista da la politica da finanzas. Sche ultra da l'abrogaziun da la taglia sin la valur da l'atgna fittanza ils custs da mantegniment ed ils tschains da daivets pudessian vegnir deducids er vinavant, alur fissi da far quint cun perditas da taglia anc bler pli grondas.

Il sistem actual promova la proprietad d'abitar
Il sistem actual per la taglia sin la valur da l'atgna fittanza è a medem temp confurm a la chaussa ed util. En cumbinaziun cun la pussaivladad da deducir ils custs da mantegniment ed ils tschains da daivets è el ina moda efficazia per promover la proprietad d'abitar, perquai ch'ils quints negativs da las immobiglias pon vegnir quintads ensemen cun l'ulteriur gudogn. Gist acquistaders novs profitan da questa regulaziun. Igl è d'agiuntar ch'il sistem actual privilegescha da princip las classas main benestantas, entant ch'ina midada dal sistem avantagess, grazia a las pitschnas grevezzas ipotecaras, las categorias cun in grond gudogn. La finamira da la promoziun da la proprietad d'abitar na vegniss betg cuntanschida cun midar il sistem, ella vegniss schizunt torpedada. Per finir chaschunass ina midada dal sistem in grond dumber da novs e difficils problems da definiziun. Perquai ch'ins na pudess betg pli deducir ils tschains da daivets ensemen cun il gudogn sch'il sistem vegniss midà, fissi per exempel da distinguer tranter ils differents daivets e tschains da daivets. Ina cumplicaziun da la procedura da taxaziun fiss ina consequenza da quai.

Naginas deducziuns sch'il sistem vegniss midà
Per il cas ch'i fiss da midar il sistem, vegniss en dumonda, tenor l'opiniun da la regenza, mo ina midada per propi. L'abrogaziun da la taglia sin la valur da l'atgna fittanza sto vegnir cumbinada stringentamain cun la stritgada da las deducziuns per ils custs da mantegniment e per ils tschains privats da daivets. Ina deducziun dals custs da mantegniment suenter ina midada dal sistem fiss da qualifitgar sco subvenziun statala zuppada per tut ils possessurs d'atgnas chasas.
Gremi: regenza
Funtauna: rg chanzlia chantunala dal Grischun