La regenza suttametta al cussegl grond la missiva ed il sboz per ina lescha davart la protecziun da datas. Ella vul reglar l'elavuraziun da datas persunalas tras las autoritads administrativas. Da nov duai vegnir instituida ina persuna independenta per la protecziun da datas.
En il Grischun duai la surveglianza davart la protecziun da datas vegnir attribuida sco lavur parziala ad ina persuna independenta ordaifer l'administraziun che vegniss elegida da la regenza. Sias incumbensas fissan tranter auter quellas da survegliar las prescripziuns davart la protecziun da datas, da manar in register da las collecziuns da datas e da cussegliar las autoritads e las persunas pertutgadas.
Cun il relasch d'ina lescha chantunala davart la protecziun da datas (LCPD) pon ins unifitgar la basa ed eliminar mancanzas existentas. La lescha nova duai reglar surtut l'elavuraziun da datas persunalas tras l'administraziun chantunala e tras las autoritads dals districts. Per ils circuls e las vischnancas avess ella vigur, sche quels na relaschan naginas atgnas disposiziuns. Disposiziuns davart la protecziun da datas na sa drizzan betg primarmain a las burgaisas ed als burgais, mabain a las instanzas dal stadi ch'elavuran datas persunalas. La gronda extensiun da las incumbensas dal stadi e surtut il diever da las tecnologias da communicaziun modernissimas pretendan che l'elavuraziun da l'infurmaziun en l'administraziun vegnia ordinada e segirada legalmain. Il sboz per ina lescha chantunala da protecziun da datas prevesa ina reglamentaziun moderna, effizienta e pratitgabla che correspunda en ses tratgs essenzials a quella da la lescha federala correspundenta. Ultra da la confederaziun disponan almain 16 chantuns da leschas da protecziun da datas.

Contribuziuns culturalas
I vegnan dadas contribuziuns resp. garanzias da deficit en l'import total da 113'500 francs a las sequentas ovras ed occurrenzas:
- Film "Dragan und Madlaina" da Kaspar Kasics e Linard Bardill (scenari),
- Film documentar "Dunnas ad Alp" (titel da lavur) da Flavia Caviezel,
- 10avels dis mundials da film a Tusaun dals 22 fin ils 26 da november 2000 e program da giubileum (kino ambulant en il chantun) d'october fin december 2000,
- Ediziun dal roman "La raccolta dals siemis" en rumantsch grischun da Claudia Cadruvi,
- Ediziun dal cudesch "Andreas Walser - Le balcon/Der Balkon" tras Marco Obrist,
- Translaziun englaisa e taliana dal cudesch "Räumlinge - Valentin Bearth & Andrea Deplazes",
- Producziun d'engrondiments fotografics da format grond da la gruppa da lavur 99/00 da Gaudenz Signorell,
- Lavur fotografica "Uferzonen" da Linus Fetz cun exposiziuns en il Grischun ed utrò,
- Concerts dal "Konzertchor Graubünden" a la fin d'october 2000 a Cazas, Cuira e Savognin,
- Concerts dal "Vokalensemble Cantio Antiqua" dals 7/8 d'october 2000 a Segl i.E. e Sent,
- Apero d'opera dal 1. da schaner 2001 a Tavau,
- Ediziun da la DC/MC dubla "So tönt's im Prättigau II" tras la Pro Prättigau,
- Produziun "Why" da l'Alpodrom Theater cun pliras represchentaziuns a Cuira ed en il chantun,
- Nova instrumentaziun da la societad da musica da Lantsch.

Consultaziuns a la confederaziun
La regenza sustegna da princip ils sforzs da la confederaziun da crear ina lescha davart eliminar dischavantatgs per umans impedids. L'access ad edifizis e stabiliments publics è ina premissa centrala per che umans impedids possian sa participar a la vita sociala. Las mesiras (architectonicas) necessarias ston dentant esser raschunaivlas, tecnicamain pussaivlas ed economicamain giustificablas.
La regenza è plitost malcuntenta cun il sboz per in'ordinaziun davart l'introducziun graduada dal traffic liber da persunas tranter la Svizra e la UE. L'ordinaziun nova è fitg concisa, uschia ch'ins ha tema ch'ins stoppia decretar directivas extendidas. Quai chaschuna la situaziun - savens crititgada - che nagin auter che l'administraziun haja la survista da las reglamentaziuns. Tar la realisaziun da la libra circulaziun sto er vegnir revedida l'ordinaziun davart la limitaziun dal dumber da las persunas estras. La procedura elegida per quest intent è tenor l'avis da regenza inacceptabla, essend che la confederaziun vul fixar las cifras dal contingent per persunas cun acquist da gudogn or da l'uschenumnà segund circul senza consultar ils chantuns.

Da las vischnancas
Il project preliminar per sanar ed engrondir il stabiliment da scola Cuira-Masans vegn approvà da princip. Vi dals custs imputabels da circa 2.8 milliuns francs vegn messa en vista ina contribuziun chantunala da construcziun da diesch pertschient.
Il project da construcziun per sanar il stabiliment da scola Farb a Schiers vegn approvà definitivamain (custs imputabels 210'000 francs, contribuziun chantunala 25 pertschient).
La revisiun parziala da la planisaziun locala da Laax vegn approvada cun resalvas, quella da Vaz cun cundiziuns.
Il plan directiv regiunal da l'Engiadin'ota concernent plazzas da golf vegn approvà.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun