Sin fundament da la refurma da las dretgiras elegia per l'emprima giada il pievel las derschadras ed ils derschaders en il Grischun.
Pli baud vegnivan las dretgiras elegidas d'uschenumnads "electurs delegads" che vegnivan numnads da la vischnanca. "Electuras delegadas" na davi uffizialmain naginas, schebain ch'ils electurs delegads eran sa chapescha per part dunnas... E dunnas vegnivan elegidas er en las dretgiras districtualas: durant la davosa perioda d'uffizi represchentavan 32 derschadras ina quota da dunnas da circa in quart. Dentant nagina dretgira districtuala vegniva presidiada d'ina dunna.
Las dretgiras districtualas vegnan a s'occupar sco dretgiras d'emprima instanza cun ils cas da dretg civil e penal. Igl è impurtant che questas dretgiras sa cumponian a moda uschè eterogena sco la populaziun dal Grischun, per ch'i possian affluir differentas posiziuns en il giudicament da causals. L'elecziun da las dretgiras è en emprima lingia in'elecziun politica. L'appartenenza da las candidatas e dals candidats ad ina partida ha l'emprima prioritad. Persunas pli giuvnas e pli veglias duessan esser represchentadas sco er ils circuls e natiralmain las dunnas ed ils umens. Sch'ins s'imaginescha la situaziun d'in divorzi cumbattì, en il qual igl èn da reglar las dumondas dal dretg da tgira e dals aliments, alura èsi cler quant impurtant ch'igl è che las dunnas possian apportar lur savida e lur experientscha. Il medem vala er per autras dumondas giuridicas.
En differents districts stattan a disposiziun diversas dunnas cun experientscha e cumpetenza. Ina represchentaziun adequata da las dunnas dependa uschia da las electuras e dals electurs.

Gremi: biro d'egualitad dal Grischun
Funtauna: rg biro d'egualitad dal Grischun