Ina reponderaziun da la situaziun actuala ch'è vegnida fatga dal biro d'egualitad davart il tema represchentanza da las dunnas sin plaun communal ha mussà che las vischnancas grischunas èn anc adina en maun dals umens. Mo gist mintga 17avla vischnanca vegn presidiada d'ina dunna, la quota da dunnas en las suprastanzas communalas è stgars 16 pertschient.
A la dumonda dal biro d'egualitad èn sa participadas 142 vischnancas (67 pertschient). Ellas han respundì detagliadamain las dumondas davart la represchentanza politica da las dunnas, davart la participaziun da las dunnas en cumissiuns ed en auters gremis communals, en il corp da pumpiers e davart l'occupaziun da plazzas communalas cun dunnas. Uschia exista uss per l'emprima giada ina survista detagliada da quests temas. E questa survista conferma la tendenza ch'ins pudeva supponer, ma ch'ins na spetgava tuttina betg uschè cleramain: er sin plaun communal èn las relaziuns da pussanza anc adina unilateralas or da vista da l'egualitad. Las dunnas èn ina pitschna minoritad en las suprastanzas communalas. 42 pertschient da tut las vischnancas vegnan manadas da spirs gremis masculins. En 46 pertschient da las vischnancas occupa ina suletta dunna in mandat en ina suprastanza uschiglio mo dad umens. Ina represchentanza ferma da las dunnas exista mo en ils gremis ch'appartegnan als ambients caracterisads tradiziunalmain sco plitost feminils: cussegl da scola, cumissiun sociala e da cultura, scola da musica. Il pli grond success ha la cumissiun da scolina cun circa 80 pertschient dunnas. Las dumondas da scolina paran d'esser ina chaussa da las dunnas.

Tge intent ha il biro d'egualitad cun questa retschertga?
Ins sto enconuscher la situaziun da partenza, sch'ins vul midar la situaziun. E cifras sin plaun communal datti fin uss (er en auters lieus da la Svizra) mo fitg paucas. Ils resultats da la retschertga duain servir sco basa per in engaschament pli intensiv dals circuls pertutgads da questa tematica: las partidas, las organisaziuns d'interess (er las organisaziuns da dunnas), dentant er las dunnas sezzas. Ideas per mesiras pussaivlas per rinforzar la represchentanza da las dunnas na mancan betg (ellas èn p.ex. resumadas en la broschura cumparida dacurt a Berna "Das Ziel ist halbe-halbe"). Plinavant èn vegnidas eruidas tras la retschertga quellas vischnancas che vulan s'occupar a moda pli detagliada da la promoziun da las dunnas en lur vischnanca. Ensemen cun ellas vegn il biro d'egualitad ad elavurar il tema sin fundament da lur giavischs individuals.
Sin in auter plaun collavura il biro d'egualitad cun l'archiv da cultura da dunnas dal Grischun. Questa collavuraziun ha la finamira da sustegnair la voluntad da las dunnas da sa participar a la politica e da porscher sustegn ad ellas per surventscher las difficultads specificas per dunnas. Il chavazzin per quest intent è rait.

Gremi: biro d'egualitad dal Grischun
Funtauna: rg biro d'egualitad dal Grischun