La chaplutta Sontga Maria Madleina è ina da las quatter chapluttas da la vischnanca da Rueun. 1983/84 è succedida la restauraziun da la chaplutta Sogn Francestg ch'è situada sper la via vers Pigniu. La baselgia parochiala da Sogn Andriu è vegnida restaurada cumplettamain ils onns 1993 fin 1995.

Davart l'istorgia da la chaplutta
La chaplutta Sontga Maria Madleina en l'anteriur aclaun Gula sa chatta da la vart dretga da la val envers Schnaus. Erwin Poeschel, l'inventarisader dals monuments d'art suppona ina chaplutta antecessura cun tetg plat dal 16avel tschientaner. I dat en egl che la baselgia da la vischnanca vischina construida da nov è consecrada dapi 1522 ultra a Sogn Bistgaun e Sogn Gieri en emprima lingia a la Sontga Maria Madleina. Gia quatter onns suenter la construcziun nova ha Schnaus acceptà 1526 la refurmaziun. Forsa è vegnida construida lezza giada ina chaplutta dals vischins a Gula, da l'autra vart da la Val da Mulin ed uschia ina nova patria per la sontga Maria Madleina bandischada da Schnaus. Il stumbel d'ina anteriura trav en il palantschin sur l'artg dal chor en la chaplutta lascha supponer ina midada da construcziun. Mademamain pudess il moviment da l'arvieut inditgar ina montascha posteriura. Domadus zains da l'onn 1643 (or da la construcziun nova?) cun l'inscripziun "SANCTA MARIA ED SS. FRANZISCE ET SANCTA MA. MAG. (maria Madleina) ORATE PRO NOBIS A. DO. 1643" èn mantegnids. Il pli grond en il clutger construì pli probabel da nov lezza giada a Gula, il pli pitschen en il clutgeret da la chaplutta Sogn Antoni a Rueun. L'onn 1643 sco data per ina midada u schizunt per ina construcziun nova da la chaplutta vegn affirmada tras las picturas en l'arvieut che n'èn betg segnadas, che nus vulessan dentant tuttina attribuir sin fundament da lur particularitads formalas e stilisticas a Giovanni Battista Macholino u a ses lavuratori. Macholino da la Val San Giacomo sper Clavenna ha segnà e datà sias frescas, e quai 1636 en la baselgia da Pigniu e 1639 en la baselgia evangelica da Sagogn. Pli probabel deriva er la pictura main perfetga en la chaplutta Sogn Francestg e forsa er quella en il chor da la baselgia parochiala da Rueun or dal lavuratori da Macholino ch'ha segnà là il maletg da l'altar dretg cun il crucifitgà l'onn 1635. L'ovra la pli veglia da Macholino en la regiun è il maletg colossal da la battaglia da Lepanto en la baselgia Sogn Vintschegn a Pleif ch'è segnà e datà 1630.

Conservar e restaurar
Ina conservaziun e restauraziun cumplessiva da la chaplutta Maria Madleina a Gula è stada inditgada curt suenter la restauraziun da la baselgia parochiala, perquai che l'arvieut da la nav cun bleras picturas era sin dar ensemen. Il tetg da stuors era en in nausch stadi e l'umiditad donnegiava ils mirs e la liadira. Novas chinettas, novs stanschains ed in conduct d'aua da sfundrada enturn la baselgia procuran per ina deflussiun da l'aua da tetg e duain minimar l'umiditad dal fundament. Da nov è er montà in parachametg. Enstagl dal tetg da stuors donnegià è vegnì fatg in tetg da schlondas larisch, la nav ed il chor vegnan cuvrids d'in tetg en muster romboid or d'unigox-stuors d'itschal. Il tetg modern da metal è vegnì elegì enstagl dal tetg istoric da schlondas, perquai che utschels-mezmieur avevan chattà refugi sut il tetg da metal. Grazia a la meglra isolaziun en il sectur dal tetg è il clima daventà uschè bun che las femellas dals utschels-mezmieur rinolof pitschen han utilisà la stad 2000 il palantschin per trair si lur pitschens.
La tetgaglia sur la nav era en in nausch stadi. Quai ha pretendì da montar in purtader traversal da metal. L'arvieut sur la nav ch'era sin il precint da dar ensemen è vegnì fixà cun numerus fists d'atschal vi da la tetgaglia resp. è vegnì pendì vi dal nov purtader traversal. Quai è ina metoda cumprovada per segirar il palantschieu sura che l'inschigner planisader Jürg Buchli aveva gia applitgà en la baselgia claustrala da Faveras ed en la baselgia parochiala da Mustér.
A chaschun da la davosa renovaziun da la chaplutta avant circa 60 onns avevan ins empruvà da dar damogn a l'umiditad en l'intern da la chaplutta cun in palantschieu da cement culà. Quest palantschieu da cement è vegnì resgià si uss per lung da las paraids, per garantir l'equiliber tranter aria ed umiditad. Il palaschieu da cement pauc bel è vegnì cuvrì cun plattas da Val S. Pieder fendidas. Ils bancs da lain pign da la davosa renovaziun han ins sulettamain bugadà. Las simplas fanestras trapartidas en lain dateschan pli probabel da l'entschatta dal 20avel tschientaner, quellas dal chor pudessan esser anc tschient onns pli veglias. La fanestra da la paraid vers sid ha pudì vegnir reparada, quella vers vest cun las numerusas picturas en la vieuta era donnegiada uschè ferm che sulettamain ina copia dal rom è stada pussaivla. En adattaziun al rom picturà han ins elegì qua per las fanestras las rudellas dal 17avel tschientaner ch'èn tipologicamain pli veglias.
Las paraids dal portal en verucan verd dal conturn èn decoradas cun emplenidas e rosettas. Ellas èn vegnidas conservadas dal restauratur Jörg Joos cun acid silicat. La porta dubla dal temp baroc ha obtegnì suenter la restauraziun entras il scrinari puspè in schlegn da fier battì.
Il retabel da l'altar baroc da lain è picturà cun imitaziuns da marmel e per part surdorà. Duas colonnas canneladas cun capitels cumposits portan ina culmaina cun travs profiladas. Il frontispizi è ina cartutscha cun la vopna dals chaputschins entagliada ed enromada plasticamain (ils mauns cruschads da Cristus e Sogn Francestg cun las plajas). Il retabel deriva dal medem lavuratori sco quel en la chaplutta da Sogn Francestg ch'è vegnì creà pli probabel a listess mument sco ils maletgs ch'èn datads 1642. Ina surpresa speziala è stada la tavla da l'altar malegiada sin taila da glin da la chaplutta da Sontga Madleina. Ella mussa il crucifitgà en cumpagnia da Maria e Sogn Gion, als pes da Cristus stat en schanuglias la patruna da la chaplutta Madleina ed ha embratschà ils pes dal Segner, dasperas stat en schanuglias Sogn Francestg. Questa pictura malinschignaivla e senza qualitad da l'altar, en cumparegliaziun cun las illustraziuns da l'arvieut, ha adina disturbà. Ella è, sco quai che las examinaziuns dal restauratur han demussà, ina trida copia pli nova da l'illustraziun originala barocca da la vart davos da la taila da glin. Il motiv per quest remplazzament è stà in donn considerabel, numnadamain in donn d'aua, da l'illustraziun dal corp da Cristus.
Questa tecnica da malegiar da buna qualitad, mo oravant tut las inizialas J.R.S a l'ur dal maletg affirman ch'i sa tracta d'ina ovra da Johann Rudolf Sturns, il pictur da la curt da Cuira. Quai ha manà a la decisiun da restaurar la pictura donnegiada. En quest connex ha il restauratur cumplettà il donn cun la tecnica reversibla tenor l'exempel da l'altar lateral da Cabbiolo (malegià 1645 da J. R. Sturn).

Picturas da l'arvieut
La decoraziun la pli preziusa da questa modesta chaplutta barocca èn las picturas da l'arvieut ch'èn mantegnidas fitg bain. Sin las paraids da la nav e dal chor èsi dà si chaltschina alva, dentant sur il profil da la curnisch che circundescha l'entira chaplutta èn ils arvieuts sur la nav e sur il chor, dentant er l'artg da triumf e l'artg sur l'entrada malegiads dal tuttafatg. En la zona da l'arvieut exista per propi in "horror vacui", pia la "tema dal vid". L'arvieut è cuvrì cun scenas figurativas da fluras e frastgas sgiagliadas sco er cun in rom da stuc malegià en grisaglias.
A chaschun da reparaturas anteriuras, probablamain a l'entschatta dal 20avel tschientaner, n'han ins betg mo tratg suenter las curnischs en la nav, mabain er cuvrì las sfessas privlusas en il center da l'arvieut da la nav, dal chor e da l'artg da triumf cun largias stritgas da molta. Cun questa metoda n'han ins strusch emplenì las sfessas, mabain implastrà ils maletgs sin il palantschieu sura da domiduas varts da la sfessa e ruinà quels per part.
Questas implastradas maladestras han allontanà ils restauraturs da la firma Joos, Andeer. Els han emplenì las sfessas cun crappa e molta da chaltschina e sch'igl era anc necessari las han els anc culadas ora supplementarmain. Silsuenter han ins cumplettà las parts dals maletgs mancantas cun tecnica da stritgins (tratteggio).
L'arvieut en il chor mussa en il center il maletg rectangular da Maria Madleina che vegn purtada dad anghels e che tegna in vasch da crisam or d'alabaster en ses maun dretg. Enromà è quest maletg (sco er quel sin l'arvieut da la nav) cun in rom da cartuscha picturà en tecnica da grisaglias e cun ina vieuta che cuntegna curnischs da feglias e da fists da perlas sco imitaziun d'in stuc plastic. Da domiduas varts vers la curnisch vegn il rom dal maletg sustegnì da mintgamai trais pitgas malegiadas cun stgaglias. Ils spazis tranter las pitgas èn decorads cun chaleschs da flurs sgiagliadas e cun frastgas malegiadas en la maniera dal 17avel tschientaner.
Ils dus chomps da flurs pli gronds a la mesadad vers nord èran vegnids destruids quasi dal tuttafatg da l'aua, là nua ch'il clutger entschaiva. Las cumplettaziuns da questa mesadad ha il restauratur fatg en la moda da picturar sin l'entira surfatscha e tenor il model da la mesadad vers sid. El las ha segnadas e datadas.
La vista da sut ensi da l'artg da triumf e l'artg en furma da tschinta malegià sin il palantschieu sura da la nav èn urlads domidus cun in bindel cotschen e medemamain decorads cun chaleschs da flurs sgiagliadas e cun frastgas.
L'entschatta da la vista da sut ensi da l'artg da triumf embelleschan da domaduas varts ritgs matgs da flurs en bellas vasas d'aur cun manetschas. Talas vasas decoreschan a moda sumeglianta ils cugns da l'arvieut da l'avantchor a Sagogn e da l'artg da triumf a Pigniu.
Er sin il palantschieu sura da la nav enromeschan urs cun vieutas en grisaglias tut las scenas figurativas. La fitg buna pictura en grisaglias cun umbrivas duai evidentamain simular stuc plastic. In stuc plastic è per propi vegnì applitgà en ina furma pli simpla en la baselgia parochiala Sogn Andriu a Rueun ed en ina furma pli ritga en la baselgia Sontga Maria a Sagogn.
Vi da la paraid da mir da l'artg da triumf en la chaplutta da Sontga Madleina è vegni scuvrì sut ina vetta da chaltschina en il center la vopna dals chaputschins. Quella è medemamain vegnida deliberada e retuschada sco las frastgas da feglias da la vart. Er questas frastgas e la vopna possedan lur models plastics en la baselgia parochiala da Sagogn.
En la paraid vers vest da la chaplutta s'avra la suletta fanestra sur la curnisch ed illuminescha directamain il palantschieu sura da la nav. La fanestra è enromada cun in larg ur ritgamain malegià. En tuns sgiagliads cotschens ed ochers è picturada ina vieuta che cuntegna sisum in putto e mascras en profil sco er frastgas. Sin ils cugns da l'artg en furma da scut che sa chatta sin la paraid al vest vegn illustrada l'annunziaziun da Maria. A sanestra stat Maria en schanuglias a l'oratori cun ils mauns cruschads davant il brust, a dretga stat l'archanghel Gabriel en schanuglias sin in banc da nivlas cun il maun dauzà per l'Anghel dal Segner. Cuntrariamain a la direcziun da la scrittira a sanestra ed en scrittira spievlada statti scrit "AVE MARIA". In profund gieu cun bustabs, perquai ch'il "AVE" spievlà vul dir "EVA", uschia che la mamma originala sco causa dal putgà vegn opponida a Nossadunna Maria sco salvadra dal putgà.
(Ina scenza d'annunziaziun cumparegliabla ha Giovanni Battista Macholino picturà er en la baselgia da Pigniu. Da quella annunziaziun è mantegnì be anc l'archanghel Gabriel ed el è vegni transferì sin la paraid al sid suenter esser stà dissolvì da la paraid da la nav a l'ost l'onn 1984. A Pigniu ha Macholino segnà e datà sia ovra 1636.)
Sin il palantschieu sura da la nav vegnan preschentadas sis staziuns impurtantas da la vita da Maria Madleina, tuttas èn tituladas cun citats latins or dals evangelis.
Sin il maletg panoramic davant en il center da l'arvieut vegn mussada la scuntrada da Maria Madleina cun il Cristus resustà, il "Noli me tangere". Cristus è vestgì cun il sdratsch enturn ils flancs, in mantì cotschen undegiant e cun in grond chapè. El cumpara davant Maria Madleina che stat en schanuglias avant el, sco ortulan cun ina pala en ses maun sanester. La scena ha lieu en in iert baroc d'in uvestg talian, preschentada vegn ella cun in palazzo, rabattas rectangularas da flurs, ina axa centrala, saivs vivas e cun ina saiv da lattas.
Il maletg panoramic sut a la part vest da la nav mussa la tschaina en la chasa da Simon, Maria Madleina è sa prosternada e sienta ils pes da Cristus cun ses chavels lungs.
Il maletg rectangular davant a sanestra illustrescha la leventada da Lazarus. Il maletg visavis reproducescha la penitenta Maria Madleina en oraziun en l'eremitagi, la grotta da Ste. Baume tar Marsiglia. Maria Madleina tegna en schanuglias in crucifix e legia or d'in evangeli avert, dasper il qual ina chavazza signifitga la caducitad da tut il terrester.
Sin il maletg sut a sanestra sa separa Maria Madleina da tut ses bains terresters. Ella stat avant ina maisa e rumpa ina tripla culana da curals. Cun l'auter maun stauscha ella in medagliun cun in purtret d'in um giu da maisa. Sin maisa sa chattan in spievel, ina forsch, cliniez, in anè, in vasch cun in viertgel ed ina vasa da flurs sco attributs dal luxus. Giu per terra en gia ureglins, perlas da curals e broschas. Grevas tendas da brocat cotschen han in ur d'aur sco la cuverta verda da maisa ed illustreschan il local luxurius, en il qual sa chatta la putganta plain ricla.
Il maletg sut a dretga reproducescha la visita da Cristus tar las duas soras. Marta serva en pe il Signur, Maria Madleina stat tschantada a ses pes e taidla. Cun quai ha ella "tschernì la meglra part".
Questas frescas sin las paraids e sin il palantschieu sura èn picturads en ina furma fluida e segira. Ellas na disponan betg da l'ardiment, da las scursanidas e da las perspectivas dals maletgs picturads 1639 da Macholino a Sagogn, ma la pictura en la chaplutta Sontga Madleina è dentant pli professiunala che quella en la baselgia parochiala da Rueun. Surtut ils roms da stuc imitads en maniera da grisaglias cun puttos e fraschlas da fritga èn malegiads a moda uschè virtuosa che nus vulessan attribuir las frescas da la chaplutta Maria Madleina a Gula al maister Macholino u almain a ses lavuratori.
En in stadi d'ina periclitaziun fermamain progredida èsi reussì, grazia a l'iniziativa dal cumin-baselgia da Rueun e grazia al manader da construcziun architect Bruno Indergand, da salvar per il futur questa preziusa ovra d'art sacrala dal temp baroc.

Gremi: tgira da monuments dal Grischun
Funtauna: rg tgira da monuments dal Grischun