En collavuraziun cun l'uffizi federal da svilup dal territori endrizza il secretariat da stadi per economia seco en Svizra ina plattafurma da communicaziun per accumpagnar INTERREG III. La finamira da questa plattafurma è da promover il barat vicendaivel d'experientschas, know-how e d'ideas innovativas tranter las singulas regiuns en Svizra e l'ulteriura Europa. A lunga vista vul ins sviluppar uschia ina rait transeuropeica solida e transparenta.
L'entschatta 2000 ha la UE prolungà per la segunda giada il program INTERREG. Quel cuntinuescha vinavant sut il titel INTERREG III tochen la fin dal 2006. Dapi che INTERREG I è vegnì lantschà l'onn 1990 han ins pudì realisar en las regiuns da cunfin svizras passa 400 projects internaziunals en ils secturs furmaziun e perscrutaziun, cultura, turissem, economia e.u.v.
Las differentas purschidas ed ils differents servetschs da communicaziun dal seco sa basan sin trais pitgas: ina plattafurma attractiva en l'internet, meds da massa stampads differenziads ed occurrenzas en connex cun la rait. Per rinforzar l'effect dals singuls instruments da communicaziun èn las trais pitgas colliadas ina cun l'autra.

Pitga 1: Internet
L'emprima pitga sa cumpona dal website INTERREG www.interreg.ch. El serva sco plattafurma per il barat electronic d'infurmaziuns via internet ed è accessibel sin la rait dapi la mesadad da settember 2000. Il cuntegn sa divida en tschintg puncts principals:
- infurmaziuns da basa davart INTERREG I, II e III
- banca da datas davart ils differents projects INTERREG
- utilisaders ed utilisadras pon chargiar giu u empustar directamain rapports, formulars ed ulteriurs documents
- forum da discussiun per circuls interessads en Svizra ed a l'exteriur
- divers links a websites cun sumegliants temas en Svizra ed a l'exteriur

Pitga 2: Meds da massa stampads
La segunda pitga furman la newsletter INTERREG ed il bulletin INTERREG ch'ins po abunar gratuitamain dal seco. La newsletter infurmescha duas giadas l'onn en furma curta davart novs svilups e projects, rinviescha a novas chaussas sin il website e cuntegna in'agenda da las occurrenzas professiunalas specificas. Il bulletin infurmescha ina giada l'onn cun reportaschas fundadas e purtrets detagliads davart il program INTERREG. Ultra da quai pussibilitescha el la colliaziun cun RegioPlus, il program naziunal da la Svizra per promover il spazi rural che dispona medemamain d'ina plattafurma d'infurmaziun.

Pitga 3: Occurrenzas
La terza pitga cumpiglia seminaris dad INTERREG che vegnan organisads mintg'onn per tut ils circuls interessads en Svizra, sco er in'exposiziun ambulanta davart INTERREG ch'ins po reservar tar il seco. L'exposiziun preschenta differents projects INTERREG cun participaziun svizra ed infurmescha davart l'organisaziun dad INTERREG III. Las visitadras ed ils visitaders emprendan a conuscher meglier las diversas regiuns da la Svizra e da l'Europa e vesan tge ch'ins ha gia pudì realisar cun INTERREG en questas regiuns. Ultra da quai dat l'exposiziun invista en la relaziun da la Svizra cun l'Europa sco er en il champ d'incumbensas da la collavuraziun transnaziunala, in sectur spezial dad INTERREG. Las singulas purschidas ed ils singuls servetschs che tutgan tar la nova plattafurma da communicaziun gidan a promover l'utilisaziun dal program INTERREG ed a superar eventualas difficultads pertutgant la realisaziun dal project cun sustegn da la communicaziun e cooperaziun. La rait dat betg il davos er impuls per crear novs projects.

Co funcziunescha il program INTERREG?
Ils daners dad INTERREG n'èn betg daners da subvenziun, mabain daners da promoziun. Quai vul dir: tgi che giavischa sustegn sto prender l'iniziativa ensemen cun partenaris da l'exteriur, preschentar in project concret, finanziar sez almain 50 pertschient da quel e cumprovar a moda vardaivla ch'il project sa porta finanzialmain sez er suenter la fasa da promoziun. Dumandads èn damai in spiert innovativ, avertadad ed iniziativa. Las experientschas mussan che bleras da questas premissas èn avant maun en Svizra ed en l'Europa cunfinanta. Per ulteriuras infurmaziuns: www.interreg.ch.

Gremi: departament da l'intern e da l'economia publica dal Grischun
Funtauna: rg uffizi da planisaziun