La regenza approva il recurs da la societad da radiofonia mobila diAx cunter il scumond general per eriger antennas da natel entaifer la zona da construcziun da la vischnanca da Küblis. La disposiziun da scumond correspundenta en la lescha da construcziun da la vischnanca da Küblis na po perquai betg vegnir approvada.
Cun il giavisch da proteger la populaziun residenta da la radiaziun electromagnetica d'antennas da natel han las votantas ed ils votants da la vischnanca da Küblis acceptà la fin da l'onn 1999 ina iniziativa che prevesa ina cumplettaziun da la lescha da construcziun da la vischnanca. L'iniziativa è vegnida provocada tras ina dumonda da construcziun concreta da la diAx per in'antenna da natel en la zona da l'abitadi.
Cunter il scumond da la lescha da construcziun d'eriger antennas da natel en las zonas da construcziun ha la diAx fatg recurs a la regenza ch'è il medem mument l'instanza d'approvaziun per decrets davart la planisaziun locala e tras quai er davart decrets en connex cun la lescha da construcziun.

L'iniziativa è illegala
En sia decisiun da recurs è la regenza vegnida a la conclusiun ch'il scumond d'antennas da natel cuntrafetschia tant al dretg da planisziun dal territori sco er a la lescha federala da telecommunicaziun e stoppia vegnir abrogà pervia da sia illegalitad.
La regenza vesa ina cuntravenziun al dretg da planisaziun dal territori en il fatg che las antennas da natel sco installaziuns d'infrastructura d'in abitadi tutgan da princip en la zona da construcziun. I saja ina violaziun dal princip da basa da la planisaziun dal territori davart il zavrar il territori da construcziun ed il territori che na po betg vegnir bajegià da vulair stgatschar en general talas installaziuns en il territori ordaifer las zonas da construcziun, senza far l'examinaziun ch'è necessaria en mintga cas singul, sch'ellas sajan liadas al lieu. Mesiras per proteger ils umans da las consequenzas da l'electrosmog sajan bain en l'interess public, ma ch'ins stoppia partir dal fatg ch'il cussegl federal haja resguardà suffizientamain quest interess public cun l'ordinaziun davart la protecziun cunter la radiaziun nunionisanta (ORNI) decretada avant curt, e quai er sut l'aspect dal princip da prevenziun.
Ultra da quai violescha il scumond da Küblis da las antennas da natel tenor la regenza la lescha federala da telecommunicaziun. Questa intenziunescha tranter auter da garantir servetschs da telecommunicaziun d'auta qualitad e cumpetitivs en favur da la populaziun e da l'economia. Tenor la regenza na sa lascha il scumond d'antennas betg s'accordar cun questa finamira, er per il motiv ch'el pudess vegnir imità en numerusas ulteriuras vischnancas en cas ch'el vegniss approvà.
Gremi: regenza
Funtauna: rg chanzlia chantunala dal Grischun