Tras la tgira gidan il chatschader grischun e la chatschadra grischuna fitg a mantegnair ils spazis da viver da la fauna e flora indigena. Uschia na profitan betg mo las spezias permessas da la tgira dals biotops.
Al di chantunal da tgira da l'uniun grischuna da chatschaders da patenta (UGCP) che vegn organisà ils 16 da zercladur 2001 da la secziun da chatschaders Lavoi a Tumein, sa deditgeschan ils var 150 participants a l'avegnir da la tgira e, sut la devisa "spazis da viver", als interess dals reptils, amfibis, organissems sut aua e da las plantas.
Meglierar quai ch'è sa cumprovà e trair a niz sinergias
En il chantun Grischun ha la tgira instradà ina nova via cun passar dal pavlar d'enviern a la tgira dals biotops. Ils spazis da viver da la selvaschina e dals animals protegids èn pia vegnids mess en il center. Per exempel mantegnan ins impurtants elements d'ina cuntrada cultivada natirala cun cultivar prads nunutilisads, regiuns umidas, bostgaglia ed urs dal guaud. Il mussament da prestaziun dals chatschaders è grond. Els segan passa 160 ha prada. La chatscha sezza na s'orientescha betg pli tenor la reducziun da singuls animals cun trofeas, mabain ha la finamira da mantegnair effectivs da selvaschina natirals e sauns che survivan l'enviern il meglier pussaivel e senza conflicts. Per la chatscha èsi impurtant ch'ins prosegueschia sin questa via e ch'ins sviluppeschia la tgira. En il futur duain ins tschertgar anc dapli partenaris per mantegnair il spazi da viver da la selvaschina e per trair a niz las sinergias tranter ils differents interessents. A chaschun dals dis da tgira, d'ccurrenzas d'infurmaziun e.u.v. è la populaziun cordialmain envidada da cooperar. "Far dal bun e mussar il resultat da la lavur" è la futura devisa da la chatscha e tgira en il Grischun.

Spazi da viver, selvaschina, chatscha e tgira - nagina cuntradicziun en il Grischun
Uss èsi uschè enavant: il fegl sgulant davart selvaschina - chatscha - tgira en il Grischun è cumparì. Cun quest flyer vegnan preschentads a moda infurmativa il senn, l'intent e la finamira da la chatscha e tgira. Ils temas selvaschina e spazi da viver sco er chatscha e tgira vegnan illustrads cun fotografias dal Grischun e commentads cun curts texts expressivs. Tgi che guarda pli bain il flyer, vegn gist intimà d'observar la fauna e flora dal Grischun e da prender il resguard necessari envers quellas. Medemamain cun ina illustraziun e cun in curt text emprovan ins da dar vinavant ina sbrinzla fascinaziun da la chatscha grischuna. Cun quest flyer tschertgan ils chatschaders activamain il contact cun la populaziun che na va betg a chatscha e cun ils giasts da noss chantun. Ultra da decleraziuns davart la selvaschina, la tgira e la chatscha sco er davart ils avantatgs geografics da noss chantun vegnan preschentads er ils purtaders dal fegl sgulant: l'uniun grischuna da chatschaders da patenta, l'inspecturat da chatscha e pestga (davent dal 1.-1-2002 novamain uffizi da chatscha e pestga) ed il museum grischun da la natira. Ultra da numerusas autras instituziuns s'engaschan els per nossa fauna e flora variada ed unica. Questa broschura vegn derasada durant las proximas emnas e po silsuenter vegnir retratga gratuitamain tar las organisaziuns menziunadas sco er tar tut las secziuns da chatscha, tar tut ils guardiaselvaschinas e tar tut ils survegliaders da chatscha e pestga.

Ur dal guaud - spazi da viver plain surpraisas
L'ur dal guaud è ina zona da contact impurtanta tranter il guaud e las surfatschas cunfinantas. Il pli savens è quai terren avert cun ina cultivaziun agricula. Sch'el vegn cultivà endretg, alura dat l'ur dal guaud ricover ad ina pli gronda varietad da spezias (passa 1'000 spezias da plantas e d'animals) ch'il guaud u il terren avert. Sin fundament da la dinamica natirala han urs dal guaud malcultivads ina nauscha structura. En il rom da la lavur da tgira gidan ils chatschaders e las chatschadras ensemen cun il servetsch forestal a tgirar per onn 31/2 fin tschintg km ur dal guaud en il chantun Grischun. L'uffizi forestal dal Grischun ha edì ils novs fatgs en il rom da sia retscha "L'uffizi forestal infurmescha ...". Il numer 7 stat sut il titel "Ur dal guaud, spazi da viver plain surpraisas". El duai infurmar la populaziun, inclusiv ils chatschaders davart l'impurtanza e las differentas pussaivladads da la tgira da l'ur dal guaud.

Gremi: inspecturat da chatscha e pestga dal Grischun
Funtauna: rg inspecturat da chatscha e pestga dal Grischun