La regenza approva ina revisiun prziala da l'ordinaziun davart l'examen da qualificaziun per chatschaders e chatschadras. Las novaziuns las pli essenzialas èn:
- Tut las candidatas e tut ils candidats che han fatg part l'onn precedent a l'examen d'armas e da tir vegnan admess a l'examen da teoria. Tgi che n'ha betg absolvì cun success l'examen d'armas e da tir l'onn precedent po pia tuttina far l'examen da teoria e repeter il medem onn er l'examen d'armas e da tir.
- A l'examen da tir vegnan admess per motivs da segirezza en avegnir be anc candidatas e candidats che han absolvì ordavant l'examen davart il diever da las armas.
- L'examen d'armas e da tir è be absolvì cun success, sch'i vegn cuntanschì en il rom "Diever da l'arma" ed en il rom "Conuschientscha d'armas" almain ina nota suffizienta e tar l'examen da tir il dumber minimal da culps.
- La prestaziun da tgira obligatoria munta sco fin uss a 50 uras. Da nov èn dentant almain 30 empè da 20 uras da prestar avant l'examen d'arma e da tir. Il motiv è quel che la dimensiun da lavur tar la tgira è pli gronda durant la primavaira/stad che durant l'atun/enviern.

Elecziuns 2002
Las elecziuns da renovaziun da la regenza per la durada d'uffizi da l'entschatta 2003 fin la fin da 2006 han lieu la dumengia, ils 3 da mars 2002. In'eventual segund scrutini avess lieu dumengia, ils 24 da mars 2002.
Las elecziuns da renovaziun en il cussegl dals chantuns per la durada d'uffizi da l'entschatta 2003 fin la fin 2006 vegnan ad avair lieu la dumengia, ils 22 da settember 2002. In'eventual segund scrutini avess lieu la dumengia, ils 13 d'october 2002.

Projects da votaziun dals 2 da december 2001
Dumengia, ils 2 da december 2001 vegn votà en il Grischun davart il sequent project: relasch d'ina lescha introductiva tar la lescha federala davart la protecziun da l'ambient (lescha chantunala davart la protecziun da l'ambient LCPAmb).
Sche la candidatura vegniss renconuschida e sch'il cussegl grond acceptass ina contribuziun durant la sessiun d'october, fissi ultra da quai da votar davart questa contribuziun als gieus olimpics 2010.

La lescha davart l'organisaziun da la psichiatria va en vigur a l'entschatta 2002
Suenter che las votantas ed ils votants grischuns han acceptà ils 10 da zercladur la lescha davart l'organisaziun da la psichiatria vegn questa messa en vigur per il 1. da schaner 2002.

Contribuziuns culturalas
I vegnan concedidas resp. garantidas contribuziuns resp. garanzias da deficit en la summa totala da 252'500 francs per:
- Exchavaziuns archeologicas en la claustra da San Jon, Müstair,
- Open-Air festivals Lan Müraia (Bergiaglia), Valragn, Listen up the music (Poschiavo), Malans, Chapella e Val Stussavgia, e
- Cuminanza da lavur grischuna da cudeschs per la giuventetgna.

Consultaziun a la confederaziun
La regenza prenda posiziun visavi la confederaziun davart la revisiun da la lescha davart la banca naziunala. Puncts essenzials da refurma èn la concretisaziun da l'incumbensa da l'institut d'emissiun sco er la circumscripziun pli detagliada da l'independenza da la banca naziunala svizra (BNS) e l'introducziun d'in duair da render quint visavi il cussegl federal, il parlament e la publicitad. Ultra da quai vegnan circumscrits a moda pli flexibla e moderna ils instruments da l'institut d'emissiun. La regenza è da princip d'accord cun las novaziuns proponidas.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun