Durant ils mais mars ed avrigl 2001 han gì lieu per la segunda giada examens d'admissiun chantunals als gimnasis, las scolas medias da diplom e da commerzi sco er als gimnasis inferiurs da las scolas medias grischunas. Var 70% da las candidatas e dals candidats han reussì ils examens. Il dumber da las absolventas e dals absolvents dal Grischun rumantsch ch'han gì success è s'augmentà marcantamain.
Ils examens d'admissiun unifitgads ed organisads communablamain a las scolas medias grischunas èn ina mesira per garantir la qualitad. Questa mesira permetta da mantegnair il gimnasi inferiur. Ils examens han gì lieu decentralmain en tut ils lieus da las scolas medias grischunas. Ils examens èn vegnids organisads en tut ils lieus cun success e senza incaps. Totalmain èn s'annunziads 923 (l'onn precedent 956) giuvenils als examens d'admissiun 2001. Reussì l'examen han sco l'onn precedent var 70 pertschient da las candidatas e dals candidats.
Preparaziun equilibrada
Ins ha dà in'attenziun speziala da tegnair quint da la trilinguitad chantunala cun dar ils pensums. Ils pensums da mintga rom d'examen han cumpilà gruppas spezialas d'examen. En questas gruppas d'examen han collavurà represchentantas e represchentants da las scolas primaras e secundaras da las differentas regiuns linguisticas. Medemamain represchentadas en las gruppas d'examen èn las scolas medias che recepeschan las scolaras ed ils scolars. La procedura d'admissiun ha assistì ina gruppa directiva sut il presidi da Dieter Hasse, manader da partiziun a la scola chantunala grischuna.
Adattà la procedura
Sin fundament da las experientschas per gronda part bunas cun ils examens d'admissiun 2000 e sin fundament dals resultats da las discussiuns cun las regiuns ha la regenza adattà singuls puncts da la procedura d'admissiun. Ella ha resguardà surtut ils giavischs dal Grischun rumantsch e talian che vuleva ch'i vegnia dà dapli paisa a las linguas chantunalas rumantsch e talian. Plinavant obtegna la nota da passagi uss bainquant dapli muntada. Las notas dals roms d'examen sut quatter ston vegnir cumpensadas dublamain per reussir l'examen d'admissiun, e quai a moda che la nota da passagi quinta cumplainamain.
Emprims resultats da l'evaluaziun dals examens d'admissiun 2001 al gimnasi inferiur
Las custaivlas lavurs preparatorias e l'adattaziun da la procedura d'admissiun han valì la paina. Quai conferma er l'emprima evaluaziun generala dals resultats da l'examen d'admissiun al gimnasi inferiur. Als examens d'admissiun al gimnasi inferiur èn sa participads 419 scolaras e scolars da la sisavla classa primara. Totalmain sa lascha pia constatar in regress dal dumber da participants (onn precedent 461 scolaras e scolars). Il dumber da las candidatas e dals candidats rumantschs è stà pli aut che l'onn precedent. Il dumber da las absolventas e dals absolvents dal Grischun rumantsch ch'han reussì l'examen è s'augmentà en cumparegliaziun cun l'onn precedent da 50 sin 64. Dal Grischun tudestg han reussì 270 giuvenils l'examen d'admissiun al gimnasi inferiur. Ils giuvenils dal Grischun talian entschaivan las scolas medias per gronda part pir suenter la segunda classa secundara u suenter la "classe preliceale".

Gremi: departament d'educaziun dal Grischun
Funtauna: rg departament d'educaziun dal Grischun