La realisaziun da l'Olimpiada d'enviern en il Grischun è ina finamira strategica da la regenza. Ils gieus èn in impuls impurtant, els duain avair in concept persistent ed ecologic. Las votantas ed ils votants grischuns vegn probablamain a prender ina decisiun preliminara impurtanta la fin da l'onn.
La regenza suttametta al parlament la missiva e la proposta per concluder davart la participaziun finanziala e la garanzia da deficit dal chantun Grischun per organisar l'Olimpiada d'enviern a Tavau 2010 (Grischun-Sviz-Turitg). Ella propona ina contribuziun chantunala da 20 milliuns francs sco er ina garanzia da deficit da la medema autezza. Sa chapescha vegnan quests daners dads libers be, sche
a) las votantas ed ils votants grischuns dattan glisch verda (probabel termin da votaziun: 2 da december 2001)
b)la confederaziun ed ils lieus da concurrenza sa participeschan al deficit, e
c) il comité olimpic internaziunal (COI) surdat la stad 2003 effectivamain l'Olimpiada d'enviern 2010 als chantuns Grischun-Sviz-Turitg.
Per la Svizra è l'Olimpiada d'enviern la suletta pussaivladad realistica da pudair organisar ina occurrenza da sport gronda. Grazia a la ferma irradiaziun da l'Olimpiada pon ins rinforzar bain la reputaziun ed il grad d'enconuschientscha da la Svizra sin plaun internaziunal. Igl è bun per la Svizra, sch'ella s'engascha per las valurs da l'Olimpiada che cumpiglian tranter auter la promoziun dal sport, la chapientscha tranter ils pievels, la promoziun da la pasch mundiala ed ina festa da la giuventetgna. Per la regenza grischuna munta l'Olimpiada d'enviern en il Grischun ina schanza per l'economia publica, cun la premissa ch'ils gieus olimpics possian vegnir concepids a moda ecologica e persistenta. Ina da las finamiras prioritaras per la proxima fasa dal project è pia er quella d'integrar las federaziuns per la protecziun da l'ambient en la planisaziun da l'Olimpiada.
Sco regiun classica per il sport d'enviern posseda il chantun Grischun ina infrastructura bain sviluppada. Per l'occurrenza gronda da sport fissi da construir be in pèr paucs implants. Tut ils stabiliments da sport stuessan pudair vegnir duvrads er suenter l'Olimpiada. La purschida da pernottaziuns existenta en il Grischun vegniss meglierada marcantamain areguard la qualitad.
Perquai ch'ins vul chattar in concept da traffic che dat la prioritad als meds da traffic publics, obtegness la Viafier retica (VR) la pussaivladad d'augmentar sia attractivitad cun cumprar ulteriur material rudlant e cun amplifitgar il traject tras il Partenz. Sin la rait da vias dal Grischun fissi da far quint cun in augment dal traffic da 25 pertschient durant l'Olimpiada.
Finanzialmain sa basa la concepziun sin il fatg che l'Olimpiada d'enviern a Tavau 2010 duess sa purtar finanzialmain sezza. Totalmain vegni fatg quint cun expensas ed entradas da mintgamai 1.3 milliardas francs:
expensas:
- investiziuns en implants da sport (da quellas var 160 milliuns en il chantun Grischun) 218 milliuns
- realisaziun operaziunala 940 milliuns
- reserva 142 milliuns
entradas:
- dretgs da televisiun 583 milliuns
-sponsoring 246 milliuns
- provediturs uffizials 56 milliuns
- entradas 137 milliuns
- contribuziuns e prestaziuns dal maun public 115 milliuns
- ulteriuras entradas (p.ex. licenzas, lottaria, commerzialisaziun e.u.v.) 163 milliuns
Sch'ins tira a niz optimalmain las schanzas da l'Olimpiada d'enviern e sche tut las investiziuns vegnan fatgas consequentamain tenor il criteri da la persistenza e da l'ecologia, alura na vegnan Turitg, il Grischun e Nossadunaun betg mo a far prova da meglras infrastructuras da sport, mabain a star generalmain en in bler meglier nivel che oz puncto cumpatibilitad da las destinaziuns turisticas e puncto lieu per occurrenzas da sport ed autras l'onn 2010. Il svilup persistent è ina da las finamiras centralas da l'Olimpiada d'enviern a Tavau 2010. Ins duai empruvar da cuntanscher e realisar el en ils champs ambient, traffic, economia, infrastructuras, cultura e societad.
L'entir text da la missiva pon ins consultar resp. stampar en l'internet sut: www.gr.ch, parlament, missivas (mo en tudestg).

Gremi: regenza
Funtauna: rg chanzlia chantunala dal Grischun