La regenza grischuna prenda conuschientscha dal rapport WEF da Peter Arbenz e suttametta quel, ensemen cun in rapport accumpagnant separat, al cussegl grond che vegn a discutar il tema en la sessiun da november.
La scuntrada annuala dal World Economic Forum (WEF) 2001 a Tavau è stada accumpagnada e turblada da protestas per part ferventas dals adversaris da la globalisaziun. Da quai èn resultads ulteriurs custs per la segirezza dal forum e per ses conturn. Surtut hai dà dumondas concernent il svilup e la futura realisaziun dal WEF. La giunta dal WEF da la regenza grischuna ha incumbensà Peter Arbenz, cussegliader da manaschis da Winterthur, ed ina gruppa da project da far in rapport davart il WEF 2001 e ses futur. L'analisa propona in nov "Spirit of Davos".

Integrar pli ferm las NGO
Il rapport da circa 70 paginas da Peter Arbenz e da sia gruppa da project attesta al World Economic Forum in'auta muntada internaziunala. Il forum, fundà l'onn 1971 da Klaus Schwab, è daventà in lieu da barat e da scuntrada betg sulettamain per la Svizra, mabain er per numerus stadis. Il WEF è ina plattafurma per in dialog politic ed economic universal. En il center da las discussiuns stattan impuls per svilups globals e regiunals, als quals na sa participeschan betg sulettamain manaders da l'eco- nomia ed auts politichers. Represchentants da la societad civila fan medemamain part.

L'onn 2001 hai dà en il conturn da la scuntrada annuala dal WEF dapli manovras da disturbi e dispitas violentas che ventileschan dumondas concernent la realisabladad a lunga vista e la proporziunalitad da mesiras da segirezza. Igl è dentant incontestà che interprendiders e politichers na pon betg schliar sezs ils problems da la globalisaziun. La responsabladad economica e sociala e la responsabladad envers l'ambient sa lascha portar be ensemen cun la societad civila. Il rapport davart il WEF discurra perquai da la necessitad d'in dialog avert e constructiv tranter ils participants dal WEF ed ils moviments da basa. Il WEF pudess uschia daventar en il futur ina basa communabla per in barat cooperativ da differents acturs e considerar quai sco incumbensa impurtanta. La scuntrada annuala duess er en il futur vegnir visitada d'exponents suprems da l'economia, da la politica e da la scienza. La preschentscha da las organisaziuns na-guvernamentalas (NGO) stuess dentant vegnir rinforzada.

Tavau sco lieu dal WEF e mesiras da segirezza
Suenter ils eveniments dal 2001 è vegnida ventilada la dumonda, sch'ins possia realisar la scuntrada dal WEF er en il futur a Tavau. Il lieu da cura climatic è daventà anc pli conuschent sin plaun internaziunal sco lieu da congress ed è daventà là ina instituziun fixa. Perquai che la globalisaziun cumpiglia adina dapli materia explosiva economica, sociala e politica, vegn il WEF probablamain er en il futur ad esser la mira da critica e da protestas emoziunalas entaifer ed ordaifer Tavau. Suenter las novissimas experientschas fatgas cun autras conferenzas e cun auters congress internaziunals èn da prevair acziuns violentas da disturbi er per las proximas scuntradas annualas a Tavau. Il rapport taxescha l'acziun da las forzas da segirezza al WEF 2001 da princip sco necessaria e proporziunala. Las mesiras hajan dentant chaschunà en singuls cas refusaziuns e bloccadas nungiustifitgadas. En il futur duain las mesiras da polizia vegnir limitadas territorialmain. Per las forzas da segirezza vegni dentant ad esser difficil da far la differenza tranter adversaris da la globalisaziun ch'èn disposts al discurs e gruppas ch'èn prontas da far diever da la violenza.

"Spirit of Davos" quinta cun sinceradad e dialog
Il WEF sto sa render quint ch'ils moviments da basa, ils adversaris da la globalisaziun ed ils critichers fan er part da la discussiun globala e ch'els na dastgan absolutamain betg esser exclus per raschuns da segirezza. In'exclusiun fiss cumparegliabla cun ina isolaziun e situaziun da fortezza. Er il congress da Publc Eye duess pudair avair lieu senza disturbis. Ils princips fundamentals dal WEF na duessan betg vegnir maschadadas cun las ideas dals moviments da basa. La finamira è plitost in dialog en il senn d'ina cultura da varietads d'opiniuns e da discussiuns constructivas. Sa basond sin questa ponderaziun ha la gruppa da project lantschà l'idea d'in "Spirit of Davos". Da quest spiert fa part en prima lingia la sinceradad. Gruppas che vulan far diever da violenza, che prefereschan tumults a debattas verbalas, stuessan vegnir exclusas e tras quai vegnir separadas cleramain dals moviments da basa. Il rapport final appellescha als critichers da declerar lur prontadad da desister da violenza. La cumparsa da tut ils acturs dal WEF duai esser transparenta.

Uschia pudess ins tut en tut reducir las mesiras da segirezza. Il "Spirit of Davos" pudess obtegnair purtaders che sa cumponan da represchentants dal WEF, da la confederaziun, dal chantun Grischun, dal circul e da la vischnanca da Tavau, da moviments da basa e da la societad civila. I vegn proponida ina gruppa d'iniziativa che tschertga il discurs cun tut ils partenaris interessads e che sviluppa reglas da gieu en il senn dal "Spirit of Davos".
Scenaris da la plazza da gieu
Il team dal project ha elavurà differents scenaris da basa per il "Spirit of Davos" che stan en il futur a disposiziun al WEF sco fundament. Favorit è l'uschenumnà scenari da la plazza da gieu. El prevesa che Tavau saja in lieu da la cultura dal dialog e da las tractativas senza violenza, ma dira, tranter ils aderents ed ils adversaris da la globalisaziun. Da quest scenari fan part er demonstraziuns, sch'ellas observan las reglas da gieu fixadas sut il motto dal "Spirit of Davos". Ils avantatgs essenzials dal scenari da la plazza da gieu èn:
- Reducziun dal potenzial da tensiuns e conflicts
- Meglieraziun da la reputaziun dal WEF, da Tavau e da la Svizra
- Custs per la segirezza che sa sbassan
- Clera separaziun e delimitaziun da gruppas prontas a crear tumults.

Perspectivas 2002
La via skizzada dal "Spirit of Davos" n'è betg realisabla dad oz a damaun. Perquai recumonda la gruppa da project la varianta da la "plazza da gieu reducida". Quai vul dir ch'il prim ston daventar activs ina gruppa d'iniziativa e purtaders che mettan il fundament per ina cultura da dialog midada. Il dialog cun ils moviments da basa è urgent. Urgenta è er la preparaziun d'in center da communicaziun e da servetsch. Er las reglas da gieu ston vegnir fixadas. La visiun dal "Spirit of Davos" stuess plaunsieu sa sviluppar e sa far valair en la realisaziun dal WEF, per ch'ils cuntrasts hajan ina schanza da sa manifestar en stima vicendaivla.

La regenza grischuna sa resalva da valitar adina puspè da nov las ristgas da segirezza. Per garantir la segirezza per il WEF 2002 ed uschia sia realisaziun insumma dovri las suandantas cundiziuns da basa:
- La valitaziun da las ristgas da segirezza ston permetter ina realisaziun responsabla dal WEF 2002.
- Il sustegn cun persunal e material vegn concedì tras ils chantuns e la confederaziun en la dimensiun dumandada.
- Il cussegl grond approva il preventiv proponì.
- Il rapport accumpagnant e la tenuta da la regenza visavi il WEF a Tavau vegnan acceptads dal cussegl grond, da la legislativa dal circul e da la vischnanca da Tavau e dal WEF.
- Il WEF ed il circul da Tavau tegnan quint dals aspects relevants dal profil da segirezza per la realisaziun da l'Annual Meeting.
- Ils adversaris da la globalisaziun èn pronts per il dialog e sustegnan la creaziun d'in forum da scuntrada a Tavau.
- I vegn creada ina basa clera dal dretg da polizia per las cumpetenzas necessarias da la polizia da segirezza (revisiun parziala da l'ordinaziun davart la polizia chantunala).

Indicaziun:
Il text integral dal rapport WEF da Peter Arbenz sco er dal rapport accumpagnant da la regenza pon ins chattar en l'internet: www.gr.ch, rubrica "parlament" (files pdf cun pussaivladad da stgargiar).

Gremi: regenza
Funtauna: rg giunta WEF