Persunas che han il dretg ni quintan d'avair il dretg da contribuziuns vi da las premias da las cassas da malsauns duain s'annunziar immediatamain tar ils uffizis communals da la AVS da lur vischnanca da domicil.
Persunas che n'han betg anc annunzià lur pretensiun per ina reducziun individuala da las premias duain inoltrar immediatamain lur dumonda d'annunzia a l'uffizi communal da la AVS da lur vischnanca. Tgi che n'ha betg retschavì in formular po retrair quel da l'uffizi communal da la AVS. Per pudair pajar ora las contribuziuns da la reducziun individuala da las premias anc quest onn supplitgain nus d'inoltrar ils formulars d'annunzia uschè spert sco pussaivel.

Tgi po probablamein pretender ina contribuziun?

Ils suandants tegnairchasas survegnan probablamain ina contribuziun:

Grondezza dal tegnairchasa	Limita d'entradas 2001 1)	Paja netta presumtiva per 2001 2)
1 creschì	26'263.--	32'000.--
1 creschì, 1 uffant	30'000.--	40'000.--
1 creschì, 2 uffants	36'048.--	50'000.--
2 creschids	43'609.--	55'000.--
2 creschids, 1 uffant	49'217.--	63'000.--
2 creschids, 2 uffants	50'440.--	67'000.--
2 creschids, 3 uffants	55'600.--	75'000.--
2 creschids, 4 uffants	60'000.--	84'000.--
2 creschids, 5 uffants	61'037.--	88'000.--
2 creschids, 2 giuvenils, 2 uffants	70'000.--	95'000.--

1) entrada suttamessa a la taglia plus 10% da la facultad suttamessa a la taglia
2) presumziun: facultad suttamessa a la taglia da 0 francs

Exempel:
Ina famiglia cun duas persunas creschidas e trais uffants retschaiva probablamain ina contribuziun, premess che sia entrada suttamessa a la taglia plus diesch pertschient da la facultad suttamessa a la taglia na surpassa betg 55'600 francs resp. che lur paja netta probabla per l'onn 2001 è pli bassa che 75'000 francs.

Dapi quest onn èn annunzias per las reducziuns da las premias da las cassas da malsauns pussaivlas durant l'entir onn. Sin dumonda da la persuna cun il dretg da pretensiun vegn fatg ina nova calculaziun da la pretensiun sch'i dat midadas famigliaras u economicas essenzialas. Ina midada da las relaziuns economicas vegn essenziala sch'ella munta ad almain 25 pertschient da l'entrada imputabla.

Gremi: uffizi da sanadad dal chantun Grischun
Funtauna: rg uffizi da sanadad dal chantun Grischun