La regenza ha gì 44 sesidas durant l'onn che va uss a fin. A chaschun da questas ha ella prendì 1985 conclus (l'onn passà 2176). Dapi 1995 ha il dumber da las fatschentas da la regenza pudì vegnir reducì marcantamain. Quai è la consequenza da diversas reorganisaziuns e midadas da cumpetenza sco er da la realisaziun dal project EFLAD (essenzialisaziun e flexibilisaziun da la legislaziun e da l'applicaziun dal dretg). Essend che fatschentas da rutina èn vegnidas delegadas sin in plaun pli bass, po la regenza sa deditgar pli profundamain a las dumondas impurtantas.
Il presidi da la regenza va il 1. da schaner 2002 a Claudio Lardi, vicepresident daventa Stefan Engler.
La regenza giavischa per l'onn nov a tuttas conburgaisas ed a tuts conburgais tut il bun, fidanza en il futur e prosperitad.

Fatgs da persunal
A la fin da december van ils suandants emploiads chantunals en pensiun:
- Fridolin Blumenthal, polizist chantunal,
- Dino Geronimi, Spleia, vier tar il district da construcziun bassa Tusaun,
- Felix Koch, Cuira, secretari tar il servetsch archeologic e
- Hans Zanotta, Ramosch, vier tar il district da construcziun bassa Scuol.
La regenza engrazia ad els per lur servetschs ch'els han prestà al chantun.
- Markus Dünner, naschì 1958, da Dünnershaus/TG, domicilià a Panaduz, daventa nov architect chantunal e successur da Erich Bandi a l'entschatta da fanadur 2002.
- Gian Cla Feuerstein, naschì 1969, da Puschlav, domicilià a Bever, daventa inschigner forestal regiunal tar l'uffizi forestal. El cumenza la lavur a l'entschatta d'avrigl 2002.
- Ernst Meier, naschì 1958, da Turitg, domicilià a Domat/Ems, daventa manader dal sectur preventiv e fatgs da quint sco era substitut dal schef da l'administraziun da finanzas. El cumenza la lavur a l'entschatta da zercladur 2002.
Chanzlia chantunala dal Grischun

Gremi: Regenza
Funtauna: rg Chanzlia chantunala dal Grischun