Las ovras idraulicas en il Grischun èn segiras e vegnan mantegnidas regularmain. Ils possessurs da las ovras electricas èn conscients da lur responsabladad. Plinavant èn els assicurads cunter eventuals privels tenor il dretg da responsabladad.
Ils 12 da december 2000 è rut in foss da pressiun da las ovras electricas vallesanas Cleuson-Dixence. Quest donn catastrofal ha fatg perder la vita a trais persunas. Silsuenter ha il departament da construcziun, traffic e selvicultura laschà sclerir la segirezza dals sistems d'aua motorica da las ovras electricas en il Grischun. Uss è avant maun il rapport correspundent, dal qual la regenza prenda enconuschientscha.
Ils possessurs da las ovras electricas pli grondas dal Grischun han respundì ad ina retschertga davart differents aspects relevants per la segirezza. Quella retschertga ha mussà ch'oz pon ins partir per il chantun Grischun dal fatg ch'ins posseda ovras electricas resp. foss e conducts da pressiun segirs e bain mantegnids. Questa constataziun vegn confermada er d'in expert extern ch'ins ha consultà. Ils possessurs da las ovras èn dal tuttafatg conscients da lur responsabladad. Malgrà controllas regularas e lavurs da mantegniment na sa lascha dentant in accident mai excluder absolutamain. Perquai han ils possessurs da las ovras electricas en il Grischun stipulà avant plirs onns assicuranzas da responsabladad respectivas per lur implants.
Las experientschas da blers onns cun il manaschi dals implants en il chantun han mussà che las ovras existentas èn sa cumprovadas dal punct da vista da la segirezza. Da princip pon ins garantir la segirezza er en il futur, sch'ins cuntinua a far premurusamain tant il mantegniment regular, sco er las controllas correspundentas. L'avertura dal martgà d'electricitad rinforza il squitsch dals custs sin las societads d'ovras electricas. En quest connex èsi da sensibilisar ils possessurs pli fitg per quest intent; il mantegniment e la controlla da lur implants na pon els insumma betg negliger.
Las ovras electricas Cleuson-Dixence en il chantun Vallais èn in implant spezial ed unic sut differents puncts da vista. Quest implant na permetta naginas conclusiuns equivalentas per las ovras electricas en il chantun Grischun. Avant ch'ins possia far eventualmain ulteriuras constataziuns davart la garanzia da la segirezza da las ovras electricas en noss chantun, èsi perquai da spetgar ils resultats da la retschertga pertutgant la ruttadira dal foss da pressiun en il chantun Vallais.
In eveniment talmain gravant sco quel en il Vallais n'avevi anc mai dà en tala guisa en Svizra. En il foss armà da pressiun, tras il qual vegn conducida l'aua dal lai da fermada Grande-Dixance sin circa 2'360 m.s.m. tar las ovras Bieudron a la Rona sin circa 500 m.s.m., è sa furmada ina sfessa da circa nov meters lunghezza. L'entschatta da la sfessa sa chattava var 100 meters sut la surfatscha ad ina autezza da 1'260 m.s.m. Or da la ruttadira èn erumpids cun gronda vehemenza circa 50'000 meters cubics aua, han penetrà la stresa da grip ed èn culads en furma d'ina enorma lavina da glitta giu en la val. Questa bova ha prendì cun sai grondas quantitads da crappa e terra sco er dus chalets ed auters edifizis agriculs. En la bova han trais persunas pers lur vita. La ruttadira dal foss da pressiun sutterran, mess en funcziun pir l'onn 1999, ha fatg surstar tant ils possessurs da l'implant sco er ils experts externs. Il motiv da la ruttadira è anc oz l'object da scleriments, uschia ch'actualmain na pon vegnir preschentads anc nagins resultats segirs.

Contribuziuns culturalas
I vegnan conderschidas contribuziuns culturalas d'in import total da 90'000 francs a las suandantas organisaziuns e projects culturals: -
festival Science et Cité per las acitivitads communablas da la Svizra orientala, en las qualas è integrada la citad da Cuira, sco lieu da scolaziun superiura, e
- program annual 2001 dal teater da marionettas Arcasperli.

La signatura electronica equivala a la suttascripziun autografa
La regenza beneventa il sboz per ina lescha federala davart la signatura electronica. La signatura electronica duai equivalair a la suttascripziun autografa. Uschia pon ins concluder contracts en il futur er per via electronica. Cun il decret proponì vegn dà in cler signal en favur dal svilup d'ina societad d'infurmaziun en Svizra. Il project è plinavant la basa per pudair promover ulteriurmain il contact electronic cun las autoritads (e-governement). En connex cun la regulaziun en detagl e cun l'execuziun vegnan ins dentant anc a stuair schliar differentas dumondas giuridicas, tecnicas e praticas.

Da las vischnancas
La revisiun totala da la planisaziun locala da S-chanf ed il plan directiv regiunal "Explotaziun da material, deponias e deposits da material" da la regiun Surselva vegnan approvads cun resalvas e cundiziuns.
Approvadas vegnan plinavant la lescha davart las taxas da cura e las taxas per promover il turissem da l'uniun d'interess per il turissem da las vischnancas dal Sursès e la revisiun parziala da la lescha da scola e da scolina da la vischnanca da Domat.
Il project da construcziun per la nova chasa da scola a Flem vegn approvà definitivamain. Als custs imputabels da var 6.7 milliuns francs vegn empermessa ina contribuziun chantunala da diesch pertschient.
Per differents projects da construcziun da vias en il chantun vegnan dads libers credits d'in import total da var 8.6 milliuns francs (amplificaziun da la via locala Valragn, reparatura da la A13 tranter Mesauc e Bichegia, correctura da la via dal Güglia tranter Rona e Crap sco er cuvrida tranter Savognin e Mot la Cresta, cuvrida sutpassadi da la viafier Zizers II, cuvrida via veglia dal Partenz tranter Seewis Pardisla e Grüsch, sanaziun entaifer il vitg da Malix sco er rempars en il Frauentobel sin la via da Scanvetg).

Persunal
- La fin da mars va en pensiun Hans Peter Nold, Cuira, adjunct forestal tar l'uffizi forestal. La regenza engrazia el per ils servetschs ch'el ha prestà en favur dal chantun.
- Christian Ambühl, naschì 1953, da ed a Tavau, daventa inspectur da victualias tar il laboratori chemic per la controlla da victualias e la protecziun da l'ambient. El cumenza l'entschatta da matg.

Infurmaziuns conc. la segirezza da las OE:
- cusseglier guvernativ Stefan Engler, tel. 081-257 36 01 (9 fin 12)
- Werner Böhi, uffizi d'energia, tel. 081-257 36 21 (14 fin 17)
- Luciano Lardi, inschigner consultativ, tel. 081-356 60 80 (9 fin 17)

Gremi: regenza
Funtauna: rg chanzlia chantunala dal Grischun