La confederaziun vuless reveder l'ordinaziun davart la lescha d'alcohol e la destillaria da chasa (ordinaziun davart l'alcohol). Da nov duai vegnir introducida ina taglia per purs e puras che brischan u laschan brischar l'atgna materia prima. Tras quai vegn reducida considerablamain la lavur administrativa tant per ils purs/las puras sco er per l'administraziun. La pussaivladad da la taglia sin la vendita duai dentant exister vinavant. Igl è dentant be pussaivel da destillar e magasinar vinars senza pajar taglia, sche la producziun cumpiglia pli che 100 liters alcohol pur per onn. La regenza e da princip d'accord cun las novaziuns, ella dumonda dentant da pussibilitar la taglia sin la vendita gia a partir d'ina producziun da pli che 50 liters alcohol pur.

Da las vischnancas
Il project da rempar cunter crudada da crappa "Schanfiggerstrasse" da la vischnanca da Langwies vegn approvà. Il chantun garantescha contribuziuns da maximalmain 494'000 francs vi dals custs cumplessivs da circa 1.2 milliuns francs.
L'engrondiment da la deponia Vallorca a Flem vegn approvà cun resalvas. El serva sco deposit per material da stgav e d'erupziun da la construcziun dal sviament da Flem (tunnel) che na sa lascha betg economisar.
Las leschas da taglia revedidas da Farera e Churwalden vegnan approvadas.
Per differents projects da construir vias en il chantun vegnan dads libers credits en l'import cumplessiv da circa 5.1 milliuns francs (protecziun da la spunda da bovas Nairs-Scuol vest, correctura da la via dal Güglia Rona-Crap, cuvrida da la via da Landwasser Tavau Frauenkirch-Tavau Plaz, cuvrida via dal Malögia Plaun dal Crot-Malögia, correctura da la via d'Alpsu Sumvitg Cuas e cuvrida da la via d'Engiadina Nauas-Scuol).
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun