I vegnan pajadas contribuziuns e garanzias da deficit en l'import total da 165'500 francs a las suandantas ovras ed occurrenzas culturalas: -
festival d'operas Engiadina / San Murezzan il fanadur 2001 (represchentaziun da l'opera da Verdi "Oberto, Conte di San Bonifacio"), -
concerts da stad en la Tumleastga 2001 (15 da fanadur fin 18 d'avust), -
concerts dal chor La Cantata il november 2001 a Cuira, Landquart e Mustér (represchentaziun da la "Messa da Requiem" da Verdi), -
occurrenzas culturalas da l'uniun da turissem Valposchiavo e da la Pro Grigioni Italiano durant l'onn 2001 a Puschlav e Brusio, -
occurrenzas culturalas dals 7 da fanadur fin ils 12 d'avust 2001 en il chastè Rätia Ampla a Riom ("Cultura agl casti"), -
producziun e represchentaziun dal toc "Merlin oder das wüste Land" da Tankred Dorst tras la gruppa da teater "ressort k" durant l'october 2001 a Cuira ed ad auters lieus dal chantun, -
represchentaziuns dal gieu al liber "Bannholz" durant l'avust/il settember 2001 tras la societad da teater Zizers a chaschun dal giubileum da 25 onns, -
producziun dal film documentar "Just an American Girl" (titel da lavur) da Daniel von Aarburg, -
novavel festival dal film a Malans dals 8/9 da zercladur 2001, -
dis da raquint a Serneus dals 27 fin ils 29 da settember 2001, -
ediziun dal cudesch "Val Fex - Ausblick in ein stilles Tal", -
ediziun dal roman "Das Krallenauge" da Vincenzo Todisco (ediziun en lingua tudestga da "Il culto di Gutenberg"), -
ediziun dal cudesch "Utschels" tras la Uniun Rumantsch Grischun, -
translaziun ed ediziun dal roman "Cara Laura" da Silvio Camenisch en lingua rumena tras Magdalena Popescu-Marin, -
ediziun dal cudesch "La Bregaglia. Patria dei Giacometti", -
ediziun dal cudesch "RESONANZEN oder die ORTung des Raums" (titel da lavur) davart l'artist figurativ Christof Rösch, Basilea/Sent, ed -
ediziun d'in catalog davart il pictur Hannes Gruber, Puntraschigna, per duas exposiziuns en Slovenia.

La regenza adatta ordinaziuns a la nova lescha da scola
Suenter che las votantas ed ils votants grischuns han acceptà il november 2000 cun la repassada dal dretg grischun er la nova lescha da scola, fa la regenza uss ina adattaziun da la legislaziun adesiva. Ils suandants decrets èn pertutgads: -
L'ordinaziun davart l'interrupziun da la scola ils firads en il chantun Grischun vegn abrogada. La cumpetenza correspundenta è uss chaussa dals purtaders da la scola resp. da las vischnancas. -
La revisiun parziala da l'ordinaziun davart il perfecziunament da las persunas d'instrucziun en las scolas popularas e las scolinas vegn approvada. Qua sa tracti d'adattaziuns linguisticas. -
I vegn relaschada ina ordinaziun davart l'elegibladad da persunas d'instrucziun per classas pitschnas, scolas realas e scolas secundaras sco er da persunas d'instrucziun spezialisadas. Qua sa tracti da la renconuschientscha da diploms. -
La revisiun parziala da l'ordinaziun davart las prestaziuns d'assicuranza per scolaras e scolars sco er per persunas d'instrucziun vegn approvada. Las prestaziuns d'assicuranza en cas dal mortori d'in scolar resp. la summa da responsabladad per persunas e per donns materials vegnan adattadas a las tariffas d'assicuranza usitadas oz. -
I vegn relaschada ina ordinaziun davart la promoziun a las scolas popularas dal chantun Grischun (uschenumnada ordinaziun da promoziun). Ella cumpiglia ils puncts relevants pertutgant il cuntegn da las directivas actualas per la promoziun e per l'attestat.
Ils novs decrets vegnan publitgads en il Fegl uffizial dal chantun.

Consultaziuns a la confederaziun
Envers l'uffizi federal da communicaziun piglia la regenza posiziun pertutgant la revisiun da l'ordinaziun davart ils servetschs da telecommunicaziun resp. pertutgant il rapport concernent il provediment fundamental cun servetschs da telecommunicaziun. La strategia da la confederaziun per cuntanscher las finamiras da la politica da telecommunicaziun sa basa sin ils trais instruments martgà, provediment fundamental e politica publica da promoziun. La regenza va da princip d'accord cun quest princip da trais pitgas, ma ella accentuescha cun insistenza ch'il terz instrument da la classica politica statala da promoziun stoppia vegnir concepì uschia ch'el ha propi er in effect per las regiuns da muntogna e periferas. Perquai spetga ella che la confederaziun integreschia correspundentas mesiras efficazias en il plan d'acziuns per prevegnir las eventualas consequenzas negativas per las regiuns tras la liberalisaziun da la Swisscom, Posta, VFF, armada e dal martgà d'electricitad. Per quest intent fixescha ella in vast perimeter, en il qual vegnan realisadas las mesiras. In provediment adequat che funcziuna è ina premissa indispensabla per che las regiuns da muntogna e periferas possian sa sviluppar socialmain ed economicamain en il futur. La regenza beneventa da princip tut las meglieraziuns dal provediment fundamental.
Medemamain beneventadas da princip vegnan las novaziuns sin il sectur dal dretg da burgais. La confederaziun vul facilitar la natiralisaziun da las giuvnas estras e dals giuvens esters ch'èn creschids si en Svizra (segunda e terza generaziun). Ma la regenza fa valair ch'i saja inditgada ina tscherta retegnientscha cun midar la politica da natiralisaziun ch'è sa cumprovada. Per quest motiv è ella cunter ch'estras ed esters ch'èn naschids en Svizra possian cuntanscher il dretg da burgais sulettamain tras ina decleranza (segunda generaziun) u automaticamain (terza generaziun).
La confederaziun examinescha actualmain la procedura valaivla en cas d'insolvenza da las bancas. Quella duai vegnir adattada a las cundiziuns actualas. En general beneventa la regenza las midadas planisadas, ma ella s'exprima criticamain davart la garanzia dals deposits.

Agid umanitar
A las suandantas organisaziuns ed als suandants projects vegnan conderschidas contribuziuns d'ina summa totala da 14'000 francs: -
SWISSAID en favur dal project "Chambal", svilup d'ina vischnanca e promoziun da las entradas per commembers dal pievel Saharia en India, -
Agid a la Rumenia Malans (sustegn general da divers projects), -
Caritas Svizra en favur dal project "Lavur suenter la guerra - agid da recolonisaziun e mesiras da reabilitaziun en la regiun devastada al cunfin cun l'Eritrea" in Etiopia, e -
Unfrenda da curaisma en favur dal project "Ils dischavantagiads dad Acham s'organiseschan" al vest dal Nepal.

Vischnancas
Per differents projects da construcziuns da vias en il chantun vegnan dads libers credits d'in import total da 12.2 milliuns francs (sanaziun via da colliaziun entaifer il vitg da Verdabbio, cuvrida da la via taliana tranter Ziràn ed Andeer, correctura da la via dal Güglia tar il Heidsee, Albanella, Rona-Crap e Crap Sés-Burvagn, correctura da la via dal Malögia Löbbia-Crot, renovaziun da la via sursilvana a dretga dal Rain tranter Panaduz e Glion, sanaziun da la via chantunala Molina-Buseno, tunnel a Mut, via tudestga tranter Trimmis e Says, reparatura da donns da schelira sin diversas vias chantunalas e sin la A13, rinforz da la galaria Scopi sin il pass dal Lucmagn).

Persunal
Marcus Vogel, naschì 1963, da Valzeina, domicilià a Cuira, daventa cumissari da taglia tar l'administraziun da taglia. El cumenza l'entschatta da settember.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun