Il spert svilup da l'informatica e da las raits ha manà a pussaivladads dal tuttafatg novas per rimnar ed elavurar datas. La protecziun da datas obtegna pia ina muntada adina pli gronda. Er en las administraziuns publicas vegnan duvradas oz las tecnologias da communicaziun las pli modernas. Quai pretenda stringentamain che l'elavuraziun da las infurmaziuns vegnia reglada e segirada giuridicamain. Mintga persuna sto avair la tschertezza che tras l'elavuraziun da sias datas na vegnian betg pregiuditgads ses dretgs da la persuna e ch'ella vegnia protegida cunter activitads d'infurmaziun inadmissiblas.

La nova lescha rinforza ils dretgs da las burgaisas e dals burgais
La nova constituziun federala garantescha la protecziun da la sfera privata e pretenda che mintga persuna haja il dretg d'ina protecziun cunter l'abus da sias datas persunalas. La lescha federala davart la protecziun da datas concretisescha questa disposiziun. Ella dat differents dretgs a las burgaisas ed als burgais. Da quels fan part per exempel il dretg d'obtegnair infurmaziuns e da prender invista, il dretg da bloccar la communicaziun da datas ed il dretg da disfar u da rectifitgar datas. Cun relaschar la nova lescha davart la protecziun da datas ademplin nus pia sin plaun chantunal in giavisch dal dretg constituziunal.

La medema protecziun da datas en l'entir chantun
L'urden che vala en il chantun Grischun areguard la protecziun da datas è oz giuridicamain insuffizient e nunsurvesaivel. Uschia pon ins applitgar la lescha federala davart la protecziun da datas mo limitadamain. Per l'activitad da las autoritads chantunalas e communalas po ella numnadamain vegnir applitgada mo a moda subsitutiva, sch'i vegn exequì dretg federal. Per l'administraziun chantunala valan perencunter las directivas da la regenza davart la protecziun da datas. Fitg bleras vischnancas na possedan naginas atgnas disposiziuns davart la protecziun da datas. Per l'administraziun chantunala e per las administraziuns communalas valan oz pia differentas regulaziuns, tut tenor sch'ellas exequeschan dretg federal, chantunal u dretg communal. Cun relaschar ina lescha chantunala davart la protecziun da datas vegn unifitgada la basa per la protecziun da datas e vegnan eliminadas las mancanzas ch'existan sin plaun communal. Difficultads da limitaziun e d'interpretaziun sa laschan uschia evitar en il futur.
Cun la lescha chantunala davart la protecziun da datas vegn creada er la funcziun d'in organ da controlla independent per la protecziun da datas. Pir tras questa instanza independenta pon effectivamain vegnir garantids ils dretgs da las burgaisas e dals burgais sin il champ da la protecziun da datas. Il post da surveglianza per la protecziun da datas posseda dretgs cumplessivs da prender invista en las actas e stat a disposiziun sco post da consultaziun e d'infurmaziun per las burgaisas ed ils burgais, las vischnancas ed er per l'administraziun chantunala.

Dapli dretgs enstagl che dapli duairs e scumonds
Novas leschas chaschunan per las burgaisas ed ils burgais magari savens novs scumonds, novas restricziuns u novas taxas. Quai n'è betg il cas tar la nova lescha chantunala davart la protecziun da datas, il cuntrari: ella rinforza ils dretgs da las singulas persunas, a moda ch'ella na destruescha u mida betg sias datas u a moda ch'ella na lascha betg prender invista en quellas a persunas nunautorisadas. Ultra da la protecziun cunter in abus da las datas persunalas concretisescha nossa nova lescha dentant il dretg d'obtegnair infurmaziuns e da prender invista, perquai che be tgi che sa, tge datas da persunas che vegnan elavuradas, po effectivamain er exercitar ils dretgs appartenents a la singula persuna.
Il cussegl grond e la regenza proponan unanimamain d'acceptar la lescha davart la protecziun da datas.

Cusseglier guvernativ dr. Peter Aliesch
Schef dal departament da giustia, polizia
e sanitad dal Grischun

Gremi: departament da giustia, polizia e sanitad
Funtauna: rg departament da giustia, polizia e sanitad