La cumissiun predeliberanta dal cussegl grond ha cusseglià sut il presidi da deputà al cussegl grond Thomas Schmid, Val S. Pieder, ed en preschientscha da cusseglier guvernativ Klaus Huber il messadi da la regenza davart la fusiun da las duas vischnancas da Donat e da Pazen-Farden a la vischanca da Donat.

Las vischnancas a la Muntogna da Schons, en spezial Donat e Pazen-Farden, cultiveschan gia ozendi ina collavuraziun intensiva. Cun la fusiun vegnan las vischnancas rinforzadas vinavant, uschia che las incumbensas pon vegnir ademplidas pli effizientamain ed anc pli savens en il servetsch da las abitantas e dals abitants. Essend che l'agricultura ha ina grond'impurtanza, è stada en il center da las discussiuns la dumonda da la regulaziun da la pastgira en vista da la fusiun. Sin proposta da la giuventetgna èn las vischnancas sa decididas per il nov num Donat; uschia vegn accentuada l'impurtanza dal rumantsch.

A chaschun da la seduta a Donat ha la fusiun chattà sustegn senza resalvas tar las commembras e tar ils commembers da la cumissiun. Ins è stà unanimamain da l'opiniun ch'i possia vegnir discurrì d'ina ulteriura refurma exemplara d'ina vischnanca.

Cun satisfacziun ha la cumissiun prendì conuschientscha che tar ils uffizis responsabels dal chantun existan en il fratemp grondas conuschientschas ed experientschas per pudair tractar cunvegnentamain en il senn da las vischnancas tut las dumondas en connex cun fusiuns da vischnancas.

Il cussegl grond vegn a tractar questa fatschenta en la proxima sessiun da november.

Gremi: cumissiun predeliberanta dal cussegl grond
Quelle: rg cumissiun predeliberanta dal cussegl grond