L'entschatta zercladur ha gì lieu il 33avel di svizzer da sport da
scola a la scola federala da sport a Magglingen. Tranter las circa 3000
scolaras e scolars da l'entira Svizra ch'èn sa participads è stà
represchentà er il chantun Grischun cun 18 squadras e cun passa 100
giuvenils. En occasiun dal di chantunal da sport da scola eran quels sa
qualifitgads per l'occurrenza naziunala, e sco recumpensa han els astgà
visitar la Expo.02 il di avant la concurrenza.
La delegaziun grischuna sut la direcziun da l'uffizi da sport dal
Grischun ha pudì sa legrar da trais medaglias:
- il stgalim superiur da Domat ha fatg titels en la cursa
d'orientaziun, categoria mixed;
- las mattas da la scola chantunala a Cuira han cuntanschì il segund
rang tar il basketball ed
- en la disciplina nudar mixed ha gudagnà il stgalim superiur da
Scuol la medaglia da bronz, sco gia avant in onn.
Uschè impurtanta sco las prestaziuns sportivas è dentant er stada
l'experientscha da cuminanza e las scuntradas tranter scolaras e scolars
da tut las parts dal pajais.
Credit Suisse Cup 2002
Entant ch'ils megliers giugadurs da ballape dal mund erueschan en
Asia il nov champiun mundial ha gì lieu da curt a Berna il di dal final
dal Credit Suisse Cup. Circa 150'000 mattas e mats sa participeschan
mintg'onn al champiunadi uffizial da ballape da scola da la federaziun
svizra da ballape. Las preselecziuns vegnan organisadas en ils chantuns.
L'uffizi da sport dal Grischun ha organisà il turnier da selecziun
chantunal en collavuraziun cun la federaziun grischuna da ballape a
Landquart. Passa 70 squadras da tut il chantun èn sa participadas ed han
giugà plain tensiun e spiert da cumbat per la victoria da categorias. La
participaziun al turnier dal final a Berna è stada la culminaziun per
las 8 squadras ch'èn sa qualifitgadas.
Malgrà ch'ils teams grischuns n'han betg dumagnà la runda
eliminatoria è la participaziun a quest'occurrenza gronda in eveniment
unic per tut ils participads.
Gremi: uffizi da sport dal Grischun
Funtauna: rg uffizi da sport dal Grischun