Grischunas e Grischuns han approvà ils 3 da mars 2002 la
cuntraproposta tar l'initiativa chantunala dal pievel per purtablas
premias da las cassas da malsauns. Il cussegl grond ha ussa da decider
davart la taxa da resalva persunala maximala. La regenza grischuna ha
deliberà per quai il correspundent messadi.
La regenza grischuna ha fixà enfin ussa mintg'onn l'autezza da la
resalva persunala per la calculaziun da la reducziun da pretsch da las
premias da las cassas da malsauns. Sco resalva persunala vala quella
part da las premias da las cassas da malsauns, la quala il assicurà ha
da surpigliar suenter subtracziun da la reducziun da pretsch (da betg
sbagliar cun la franschisa). Questa resalva persunala, fixada tenor la
politica da finanzas, crudava or enfin ussa pli auta u pli bassa,
mintgamai tenor la situaziun finanziala dal chantun.
Il cussegl grond concluda
La regenza dumonda ussa al cussegl grond d'applitgar la resalva
persunala maximala ch'è fixada en la lescha. Tar entradas imputablas
enfin fr. 10'000.-- è quella maximal tschintg pertschient e per entradas
sur fr. 50'000.-- maximal diesch pertschient. Tranteren crescha la
resalva persunala maximala per in pertschient pro fr. 10'000.-- dapli
entradas. Il cussegl grond duai decider la taxa da resalva persunala
maximala ch'è vegnida proponida davart da la regenza per il 1. da
schaner 2003.
La regenza quinta che l'onn 2003 stoppia vegnir spendì circa 19
milliuns francs meds finanzials dal chantun per la reducziun da pretsch
da las premias. Mintg'ulteriur onn vegnan a vegnir vitiers var in
milliun francs uschè che a partir da l'onn 2007 vegnan duvrads mintg'onn
radund 98 pertschient dals meds finanzials totals che stattan a
disposiziun da la confederaziun e dal chantun per la reducziun da
pretsch da las premias da las cassas da malsauns
Dumber minimal da la polizia chantunala vegn auzà
En il rom da l'examinaziun periodica dals duairs da la polizia
chantunala ha la regenza grischuna fixà per il 1. da schaner 2003 il
dumber minimal sin 375 plazzas. Quai correspunda en media a l'inventari
effectiv da plis onns, il qual è sa reducì en il fratemp tras pensiuns
da vegliadetgna anticipadas e tras autras partenzas sin 357 plazzas.
Per cuntanscher il nov dumber previs è vegnida fixada la proxima
scola da polizia per l'onn 2004. Suenter duajan vegnir manadas tras
scolas da polizia mintga dus onns. A vista mesauna pon uschia vegnir
ademplids ils pensums da la polizia en il rom da fin ussa. L'auzament
dal dumber e la scola da polizia 2004 han anc da basegn dal consentiment
da la cumissiun da gestiun dal cussegl grond.
La gulivaziun da la forza fiscala er l'onn 2003 tar ina tariffa da
86%
Mintga dus onns attribuescha la regenza las vischnancas a las
singulas gruppas cun capazitad finanziala, la davosa giada l'onn 2001
per ils onns 2002 e 2003. Mintg'onn per cunter fixescha la regenza la
tariffa da gulivaziun per las vischnancas da la gruppa cun capacitad
finanziala 4 e 5. Per l'onn 2003 ha la regenza laschà questa tariffa tar
86 pertschient.
La gulivaziun da la forza fiscala duaja pussibilitar a las
vischnancas cun ina forza fiscala relativa (entradas fiscalas e tschains
d'aua per persuna) sut la media chantunala d'approximar lur prestaziuns
a la media dal chantun. La gulivaziun ha mintgamai be lieu per ils
emprims 200 abitants.
Dismetter la lozza da serenera empè da l'utilisar
La regenza grischuna sustegna en sia consultaziun per maun dal
departament federal per am-bient, traffic, energia e communicaziun
(ATEC) la mira da scumandar cumplettamain entaifer trais onns la lozza
da serenera sco ladim. Radund la mesadad da las fatschentas agriculas
dal Grischun vegnan cultivadas tenor las directivas da l'agricultlura
biologica. Là è il scumond da duvrar lozza da serenera sco ladim fixà
dapi adina. En general dovra il Grischun fitg pauca lozza da serenera en
l'agricultura. Il scumond general da duvrar lozza da serenera en
l'agricultura duai ir en vigur l'atun 2005.
Nova regulaziun da la cunvegnientscha da tariffa tranter
l'associaziun Spitex Grischun e la Santésuisse
La regenza grischuna ha approvà la cunvegnientscha da tariffa
tranter l'associaziun Spitex Grischun e la Santésuisse. Tut segund
prestaziun s'auza la pauschala da tgira per ura var dus enfin tschintg
francs; ella stat ussa tranter 40 e 53 francs. Per ils assicurads
chaschuna questa adattaziun in augment da la premia per circa 30 raps
per mais.
Contribuziuns da custs da transport curran gia 2002
Per il 1. da settember 2002 ha la regenza grischuna mess en vigur la
lescha d'ambient dals 2 da december 2001 (lescha introductiva tar la
lescha federala davart la protecziun da l'ambient) e l'ordianziun
chantunala davart la protecziun da l'ambient. Surtut impurtant en quest
èn las regulaziuns da la gulivaziun dals custs da transport. Las
contribuziuns per cumpensar fitg autas chargias per il transport a lunga
distanza dals ruments chasals cun la viafier èn budgetadas en il plan da
finanzas 2003 fin 2006 cun annual fr. 250'000.-. Per gia pudair pajar
tranter settember e december 2002 contribuziuns als custs da transport
ha la regenza approvà in credit posteriur da fr. 54'000.-.
Or da las vischnancas e las regiuns
- La regenza grischuna ha approvà la revisiun parziala da la
planisaziun communala da Schlarigna (plan d'avertura dal terren 1:5'000
"indriz da far naiv artifiziala") areguard suandantas determinaziuns:
- Ils indrizs d'infrastructura per far naiv artifiziala en il
territori da las pistas "Saluver", "Mezzauna", "Prinzess", "Chüderas" e
"Glüna" (inclusiv la surfatscha d'ennavada en quest territori);
- Las staziuns da pumpar previsas (inclusiv la cumplettaziun dal
reservuar d'aua a Marguns).
- La regenza ha approvà la revisiun parziala da la constituziun
communala da La Punt Chamues-ch. Tenor quella duaja il cussegl da scola
sa constituir sez en il futur.
- Medemamain ha la regenza approvà il plan d'avertura general 1:2000
Davous Crasta da la vischnanca da Zuoz.
Contribuziuns chantunalas per differentas organisaziuns ed
instituziuns
- La regenza ha approvà definitivamain il preventiv per
l'engrondiment dal bajetg dal stgalim superiur "Usserfeld" a Grüsch ed
ha concedì ina contribuziun finanziala per bajegiar da maximal fr.
515'000.--.
- Per il provediment d'aua nov e per ils indrizs d'idrants da la
vischnanca da Flerda ha la regenza dà liber ina summa da total circa
304'000. - francs.
- Las vischnanca da Madulain e da Schluein retschaivan total radund
fr. 400'000.- sco pajament per construir trottuars novs.
- La vischnanca da San Vittore dastga bajegiar ina nova
allontanaziun da las auas da via per la via d'access San Vittore-Monti
Giova sco era ina nova lingia da deflussiun tranter la zona Grotti ed il
canal avert da la Viafier retica. La lingia da deflussiun insuffizienta
da l'aua da la via chantunala manava dapi onns en cas da grondas
burascas tar inundaziuns en la zona Grotti. Sco importo per construir la
lingia da la chanalisaziun ha la regenza concludì ina contribuziun da
maximal fr. 75'000.--.
Objects da vias
- La regenza grischuna ha concedì in credit da 73,5 milliuns francs
per lavurs d'impressari al tunnel dal San Bernardin.
Persunal
- Ruedi Waldburger, sesent a Küblis, è vegnì eligì sco manader da
construcziun dal sectur e sco substitut dal manader da construcziun
superiur da l'uffizi da construcziun bassa.
- Dr. med. Bigna Infanger-Damur, sesenta a Cuira, è vegnida eligida
sco media superiura al ospital da dunnas Fontana.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun