La regenza grischuna ha prendì posiziun concernent la directiva da la confederaziun "Reducziun da la canera da las viafiers - realisaziun da mesiras da protecziun cunter la canera tar edifizis existents" da l'uffizi federal da traffic. Concret vai en questa directiva per la montascha da fanestras cun isolaziun cunter la canera en edifizis, en ils quals ils abitants èn exponids memia fitg a la canera da la viafier. Tut tenor quant auta che la chargia da canera è, surpiglia la confederaziun dals proprietaris fin a 100 pertschient dals custs che resultan da la sanaziun da l'isolaziun cunter la canera. Tenor il sboz da directivas po il proprietari renunziar a la sanaziun da l'isolaziun cunter la canera, sche la chargia na surpassa betg la valur d'alarm ed el nizzegia sez l'immobiglia. La regenza grischuna s'engascha ussa tranter auter che las sanaziuns duain esser obligatorias, sch'il proprietari na vul betg surpigliar sia part dals custs, ma ha sutaffittà l'immobiglia. Ina renunzia a las mesiras da protecziun cunter la canera senza cunvegnientscha cun ils fittadins, na correspundia betg a l'intent da la sanaziun cunter la canera, constatescha la regenza.

L'ordinaziun da bancas vegn restructurada
En l'avegnir na duai betg pli esser pussaivel da fundar e manar cassas da deposits da l'agen manaschi. Quai prevesa la revisiun da l'ordinaziun da bancas (art. 3a). Cassas da spargn da manaschis n'èn, malgrà lur caracter da banca, betg suttamessas a la surveglianza da la cumissiun da bancas ed ils depositurs na giaudan nagina protecziun da depositurs tenor la lescha da bancas. Perquai approvescha la regenza grischuna en sia consultaziun per mauns dal departament federal da finanzas l'intenziun da la revisiun. Deposits tar uniuns, fundaziuns e cooperativas cun in intent ideal u in agid vicendaivel communabel, na duain ultra da quai betg pli valair sco deposits dal public. Quai duai simplifitgar a las uniuns e fundaziuns betg activas en il sectur da las finanzas, da finanziar lur projects. Als depositurs vai en quests cas en emprima lingia per promover l'intent da l'uniun u da la fundaziun. La protecziun dals depositurs gioga perquai ina rolla secundara.

Da las vischnancas e regiuns
- Il dretg d'utilisar la forza d'aua da l'ual da Laax e da l'ual da Flem aveva fin ussa l'ovra electrica da la vischnanca da Flem che maina l'implant electric Bargaus resp. l'implant electric Stenna. Cun transferir l'ovra electrica da la vischnanca da Flem en la societad d'aczias Flims Electric AG, ston ussa las concessiuns correspundentas da las vischnancas pertutgadas (Laax, Sagogn e Flem) vegnir transferidas sin la nova societad d'aczias. La regenza grischuna ha approvà il transferiment da las concessiuns.
- La regenza ha approvà la nova constituziun dal circul Val Müstair.
- L'entschatta da zercladur 2002 han las votantas ed ils votants da la vischnanca da Tujetsch approvà la revisiun parziala da la planisaziun locala. Questa decisiun ha uss era confermà la regenza grischuna, e quai per il plan d'avertura general Sedrun-Salis 1:500, il plan d'avertura general Selva-Giu Milà 1:5000 ed il plan d'avertura general indriz da far naiv Val Val-Val Tirams 1:5000.
- La vischnanca da Castasegna ha revedì la planisaziun locala. L'extract dal plan da zonas "estratto del piano delle zone" 1:1000 è uss er vegnì approvà da la regenza.
- La regenza ha approvà per suandantas vischnancas la nova lescha creada davart las taxas da cura e las contribuziuns per la promoziun dal turissem: Pagig, Praden, St. Peter e Tschiertschen.
- La revisiun parziala da la constituziun communala da Brinzauls è vegnida approvada da la regenza. Da nov vegn reducì il dumber dals commembers da la suprastanza communala d'ozendi tschintg sin trais e tuts dus commembers da suprastanza dal cussegl da scola duajan da nov vegnir elegids da la radunanza communala.
- La cumpetenza finanziala da la suprastanza communala da Susch duaja vegnir auzada; per expensas unicas sin fr. 10'000.-- (enfin ussa 5000.-- francs) e per costs annuals che sa repetan sin fr. 2000.-- (enfin ussa 1000 .-- francs). La regenza ha approvà la correspundenta revisiun parziala da la constituziun communala.


Projects da vias
- Sin fundament da la consultaziun sistescha il chantun il project da curreger e schlargiar la via tras il vitg da Mut e ceda quest traject da la via chantunala en proprietad e per mantegniment a la vischnanca. Il chantun percunter projectescha, construescha e surpiglia en proprietad e per mantegniment il sviament nord da la vischnanca da Mut, cuntegnì dapi il 1983 en la planisaziun locala, sco nova via da colliaziun chantunala.
Contribuziuns dal chantun a diversas organisaziuns ed instituziuns
La regenza grischuna ha decidì da dar 20'000 francs a la chadaina da fortuna. Questa contribuziun duai ir a favur da l'acziun d'agid d'urgenza per las unfrendas da las catastrofas d'inundaziun en l'Europa e l'Asia.

Persunal
Peter Vincenz, domicilià a Fläsch, è vegnì tschernì per il 1. da december 2002 sco nov cussegliader da scola e d'educaziun da l'uffizi per secturs da scola spezials.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun