En sia posiziun per mauns dal departament federal da l'intern
sustegna la regenza grischuna la lescha federala davart las linguas
naziunalas e la chapientscha vicendaivla tranter las cuminanzas
linguisticas. Questa lescha è il resultat consecutiv da l'artitgel da
linguas formulà da nov en la constituziun federala l'onn 1996.
La nova politica da linguas da la confederaziun è vegnida concipida
da princip da nov dapi ch'il nov artitgel da linguas stat en la
constituziun federala. Ella pretenda da la confederaziun in engaschament
pli grond e vast. Il chantun Grischun spetga da la nova lescha da
linguas in sustegn supplementar en sias stentas. Ina legislaziun
executiva è particularmain necessaria per reglar il retorumantsch sco
lingua uffiziala parziala sco er per concretisar ils secturs da la
promoziun da la chapientscha vicendaivla e dal sustegn dals chantuns
plurilings. Da la nova lescha da linguas spetga il chantun Grischun
ch'ella mantegnia vinavant las mesiras existentas e sustegnidas fin uss
da la confederaziun e ch'ellas vegnian cuntinuadas. Ultra da quai duai
ella era instradar novas mesiras cun la participaziun da la
confederaziun.
Il Grischun è il sulet chantun en il qual i vegn discurrì rumantsch.
El è ultra da quai il sulet chantun triling. Concernent las stentas per
examinar e promover la plurilinguitad en il chantun è quel dependent
ch'i vegnia resguardà las relaziuns specificas dal retorumantsch e la
trilinguitad en il chantun. Cun las instituziuns existentas n'èsi betg
pussaivel da correspunder a quest giavisch. Il Grischun pretenda per
quest motiv ina instituziun per plurilinguitad en furma d'in institut u
center da cumpetenza en l'intschess dal chantun, che vegn collià cun
instituziuns sumegliantas dad autras regiuns e gruppas linguisticas.
Concordat concernent la scola svizra d'inschigner
La regenza suttametta al cussegl grond ina revisiun totala dal
concordat concernent la scola svizra d'inschigner per l'agricultura a
Zollikon (BE). Il concordat regla sco fin uss ils dretgs e las
obligaziuns sco er l'organisaziun dal purtader da la scola. La scola sa
numna da nov Scol'auta svizra per l'agricultura, ella ha pia il status
d'ina scol'auta professiunala. Diversas midadas e divers svilups dals
davos onns han chaschunà questa revisiun totala dal concordat.
Finanzialmain resultan naginas midadas per il chantun Grischun.
Da las regiuns e vischnancas
Ils uffizis da stadi civil da Fanas, Grüsch, Schiers, Seewis e
Valzeina vegnan unids tar in sulet uffizi da stadi civil cun il num
"Zivilstandsamt Vorderprättigau" cun la sedia a Schiers. La fusiun
obtegna vigur legala il pli tard cun l'entschatta da l'onn 2002.
Las revisiuns da las leschas da taglia da Mastrils, Savognin,
Seglias e Tinizong-Rona vegnan approvadas, medemamain la nova lescha da
taglia da Suraua.
Tranter la colliaziun cun Avers e quella cun Spleia sin l'autostrada
A 13 c cun traffic na separà datti adina dapli accidents da traffic.
Pertutgada da quai è surtut la regiun da la colliaziun cun Sufers. Per
meglierar la situaziun dal traffic e per impedir ulteriurs accidents
vegni montà en domaduas direcziuns dal traject pertutgà in scumond da
surpassar (signals da traffic e lingias da segirezza). Questa mesira va
en vigur, uschè spert che la signalisaziun e la marcaziun sin la via è
realisada.
Persunal
- Johann Hummel, naschì 1970, da Sonterswil TG, domicilià a
Tavau-vitg, daventa collavuratur tar il secretariat da la cumissiun da
gestiun e da la surveglianza da finanzas. El entschaiva cun la lavur a
l'entschatta da fanadur.
- Max Knecht, naschì 1969, da Döttingen AG, domicilià a Brugg,
daventa manader da la projectaziun da vias principalas tar l'uffizi da
construcziun bassa. El entschaiva cun la lavur a l'entschatta da
fanadur.
Chanzlia chantunala dal Grischun
Gremi: regenza
Funtauna: rg chanzlia chantunala