Dals 7 fin ils 9 d'october 2002, durant la sessiun d'october, sa ferma l'exposiziun ambulanta davart la nova concepziun da la gulivaziun da finanzas e da las incumbensas (NGF) en l'edifizi dal cussegl grond a Cuira. Glindesdi, ils 7 d'october 2002 da las 17.30 fin las 19.00 ha lieu in'occurrenza d'infurmaziun per ils commembers dal cussegl grond. Previs èn referats da president da la regenza Claudio Lardi, directura da finanzas Eveline Widmer-Schlumpf e dal delegà NGF dals chantuns, il landamma da Son Gagl Peter Schönenberger. L'exposiziun e l'occurrenza d'infurmaziun èn publicas.

La nova concepziun da la gulivaziun da finanzas e da las incumbensas (NGF) è in project communabel da la confederaziun e dals chantuns. I sa tracta d'in dals pli impurtants projects da refurma dals davos onns. In project ch'è fitg cumplex e tecnicamain pretensius. Perquai han concludì la confederaziun ed ils chantuns da lantschar ina campagna d'infurmaziun. L'element central da questa campagna è l'exposiziun ambulanta davart la NGF.

Cun questa exposiziun e cun questa occurrenza d'infurmaziun vulan ins gidar a promover ina discussiun objectiva e constructiva davart la nova concepziun da la gulivaziun da finanzas e da las incumbensas. Spezialmain duain vegnir preschentadas en quest connex er las consequenzas per il chantun Grischun.

L'exposiziun ambulanta davart la NGF sa ferma il november 2002 en ulteriurs lieus dal chantun Grischun:
5 fin ils 8 da november 2002, Academia Engiadina Samedan
11 fin ils 15 da november 2002, sala dal cussegl cirquital da Tavau
18 fin ils 22 da november 2002, scol'auta da tecnica ed economia (STE) Cuira
26 fin ils 28 da november 2002, sala da la chasa-cumin Glion
Ulteriurs detagls sco er las uras d'avertura exactas pudais Vus leger en la pressa quotidiana.

Gremi: departament da finanzas e militar dal Grischun
Funtauna: rg departament da finanzas e militar dal Grischun