La regenza grischuna ha fatg emprimas decisiuns persunalas per la scola'auta pedagogica SAP. Per il 1. da schaner 2003 èn elegids Andrea Jecklin sco directur da la SAP, Peter Voellmy sco manader da la partiziun scolaziun da basa e vicedirectur sco er Marianne Wittwer sco manadra dals servetschs. Els fan part da la direcziun da la scola SAP. Andrea Jecklin è oz directur dal seminari da magisters dal Grischun e manader dal project SAP, Peter Voellmy è directur da la partiziun dal seminari da la scola da dunnas dal Grischun e Marianne Wittwer è manadra da la partiziun dal seminari da la scola da dunnas dal Grischun.
L'organigram da la SAP è dividì en quatter secturs: scolaziun da basa, furmaziun supplementara, perscrutaziun e svilup sco er servetschs. La regenza ha discutà quest organigram e prendì conuschientscha da tal.

La revisiun parziala da las disposiziuns executivas tar la lescha da la tgira da malsauns è vegnida dada libra per la consultaziun
La regenza grischuna ha dà liber il sboz da la revisiun parziala da las disposiziuns executivas tar la lescha davart promover la tgira da malsauns e l'assistenza da persunas attempadas e che dovran tgira (lescha davart promover la tgira da malsauns). La revisiun parziala cumpiglia l'adattaziun a l'ordinaziun federala davart la relevaziun dals custs e la registraziun da la prestaziun entras ospitals e chasas da tgira. Ella entra en vigur il 1. da schaner 2003. Ultra da quai vegnan proponidas en las disposiziuns executivas er midadas da procedura en connex cun ils acquist supplementars e da substituziun enfin tar la summa da 50'000.-- francs.
Medemamain ha la regenza tramess en la consultaziun las disposiziuns executivas davart la renconuschientscha d'organisaziuns da la tgira ed assistenza a chasa sco er da la cussegliaziun per mammas e babs. A quest'occasiun duain las directivas per la contabilitad vegnir revedidas parzialmain.

Pavlar cun vanzadiras na duai betg vegnir restrenschì
Periodicamain adatta la confederaziun l'ordinaziun davart epidemias d'animals al pli nov stadi da la scienza, a la situaziun actuala da privel ed a las enconuschientschas da l'execuziun. En il center da la midada da l'ordinaziun stattan il pavlar cun vanzadiras, l'inseminaziun artifiziala, la pesta dals portgs, la sturnadad bovina sco er duas malsognas dal lom.
Center da l'ordinaziun da la regenza grischuna è tranter auter l'intent da la confederaziun da pavlar mo pli portgs da maz, ch'abandunan lur uigl be per la meztga, cun vanzadiras che cuntegnan parts da charn. Ultra da quai na dastgan betg vegnir tegnids auters animals d'ungla (arments, chauras, nursas). Questa mesira duai en spezial far ulteriurs rempars encunter la derasaziun d'epidemias fitg contagiusas (zoppina, pesta dals portgs classica).
La regenza è da l'opiniun che la mesira proponida na schlia en sasez betg il problem, tant pli che la confederaziun considerescha la regulaziun d'enfin uss - da stgaudar las vanzadiras avant da las pavlar - sco adattada er per l'avegnir. Il sulet motiv per la midada proponida è la circumstanza che las prescripziuns valaivlas na vegnan forsa betg respectadas consequentamain avunda. Pretensiuns amplifitgadas per l'igiena, ils indrizs tecnics e per la surveglianza d'implants lubids laschan parair inutilas ulteriuras restricziuns per pavlar vanzadiras, scriva la regenza en sia consultaziun per maun dal departament federal da l'economia publica. La regulaziun proponida da la confederaziun periclitescha l'existenza da manaschis dal Grischun ch'èn endrizzads fitg bain ed ella promova per mancanza d'autras pussaivladads la dismessa illegala da las vanzadiras.

Contribuziuns chantunalas a differentas instituziuns
- Per l'infrastructura dal persunal e da l'administraziun da l'intermediaziun da muvel SA dal Grischun ha la regenza concludì in'indemnisaziun pauschala da 100'000.-francs per l'onn 2002.
- Il teater da la citad da Cuira retschaiva ina contribuziun chantunala da 200'000.-francs per la stagiun 2002/2003. La mesadad da la summa sto anc vegnir approvada dal cussegl grond en il rom dal preventiv 2003.
- L'uniun da ludotecas dal Grischun survegn per l'onn da manaschi 2002 in sustegn da 20'000.-francs sco contribuziun a la cultura da giuventetgna.

Or da vischnancas e regiuns
- La regenza ha approvà il plan directiv regiunal Engiadin'ota "implants da far naiv", quai però cun indicaziuns expressivas per differentas regiuns da skis.
- Il plan general d'avertura 1:5000 ennavada da la regiun da skis Corviglia (implant da far naiv Suvretta la part il pli giudim) da la vischnanca da San Murezzan vegn approvà. En quest rom ha la regenza constatà ultra da quai, che l'implant da far naiv Suvretta po vegnir construì e manà ecologicamain.
- La vischnanca da Roveredo ha concludì entras ina votaziun dal pievel l'onn 2001 ina revisiun totala da la planisaziun locala. La regenza grischuna ha ussa approvà ils correspundents meds da planisaziun.

Projects da vias
- Scuol: Il traject da la via da Ftan da l'hotel Bellaval enfin tar l'access al transit local Scuol tar il café Collina vegn cedì dal chantun a la vischnanca; persuenter surpiglia Scuol la via communala da la diromaziun sviament Scuol enfin tar la diromaziun hotel Lischana.
- Schiers: Per far duas fermadas da l'auto da posta en las vias Dorfstrasse e Farbstrasse ha la regenza dà liber maximalmain 44'500.-- francs.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun