Er en l'avegnir èn legitimads ils magisters e las magistras primaras d'instruir tut ils roms en scola primara. Quai ha la regenza decidì en il rom da lur decisiuns preliminaras per la concepziun da la scol'auta professiunala da pedagogia (SAP).

Las magistras ed ils magisters primars che vegnan scolads a partir da l'onn 2003 a la SAP èn generalistas e generalists; lur diploms legitimeschan d'instruir tut ils roms da la scola primara. Quai na sa chapescha betg da sasez, sch'ins considerescha las novas pretensiuns che la professiun ha d'ademplir. Dasper ils roms d'instrucziun usitads sa tracti da l'integraziun linguistica e culturala dals uffants, da la promoziun d'uffants cun duns extraordinaris, da la pedagogia speziala, da l'informatica, da l'educaziun sanitara, dal svilup da la scola, da las seras da gentiurs e da bler auter. L'instrucziun da las duas linguas è pir gist vegnida introducida e gia stat cun l'englais in'ulteriura lingua en discussiun per la scola primara. La furmaziun da basa è dumandada cun la preparaziun per tut questas incumbensas. Bleras scol'autas professiunalas da pedagogia svizras e scol'autas professiunalas schlian quest problem uschia ch'ellas na scoleschan betg generalistas e generalists, mabain persunas d'instrucziun che pon instruir sulettamain in dumber restrenschì da roms.

En sia situaziun speziala ha tschernì il chantun Grischun in'autra via che po satisfar a las pretensiuns da las scolas pitschnas. La scolaziun a la SAP legitimescha las persunas d'instrucziun d'instruir tut ils roms dal plan d'instrucziun da la scola primara. Per set roms èsi previs in studi pli profund. Quatter roms èn obligatoris per tuts: prima lingua (tudestg, talian u rumantsch), ina secunda lingua chantunala, matematica sco er uman ed ambient. Plinavant tschertgan las studentas ed ils students ord ina sparta da tschintg roms d'elecziun obligatoris anc trais ulteriurs roms ch'els studegian pli profund. En ils ulteriurs dus roms restants absolvan els in studi da basa che correspunda circa a la scolaziun d'ozendi. Ils roms d'elecziun obligatoris cumpiglian chant e musica, furmaziun creativa, lavurs a maun senza textilias, lavurs a maun cun textilias e l'educaziun sportiva. A la scolaziun da musica aifer il sistem dals roms d'elecziun obligatoris vegn deditgà dapli attenziun. Per l'ina è previsa l'instrucziun obligatoria d'in instrument e per l'autra fan tut las studentas e tut ils students musica en in chor u en ina furmaziun instrumentala durant l'entir temp da scolaziun.

La schliaziun grischuna porscha la pussaivladad che las futuras magistras ed ils futurs magisters primars pon trair a niz lur fermezzas individualas per l'instrucziun. Quai vala cunzunt per las studentas ed ils students ch'entran nà d'ina professiun en la SAP. Els pon qua tras nizzegiar lur abilitads per la scola. Quai correspunda a las finamiras da la refurma.

Ulteriuras infurmaziuns: www.pfh.gr.ch

Quai è la communicaziun da medias nr. 4 da 4 concernent il studi a la SAP

Gremi: departament d'educaziun dal Grischun
Funtauna: rg departament d'educaziun dal Grischun