Dapi la stad 2002 ha la chanzlia chantunala occupà da nov quatter da las tschintg plazzas vacantas ed ultra da quai reorganisà la direcziun da l'agen servetsch da translaziun.

Sco nov manader dal servetsch da translaziun è vegnì elegì Beat Dermont, Rueun. La chanzlia chantunala ha decidì da laschar crudar il model da direcziun d'enfin ussa dal "primus inter pares" e da plazzar la lavur da direcziun ordaifer il team da translaziun. Dermont surpiglia per il 1. da november 2002 ses nov pensum. El lavura dapi var dus onns en il sectur da l'administraziun da la chanzlia chantunala ed el è da lingua materna rumantscha.

Durant la stad èn vegnids vitiers da nov tar il team dal servetsch da translaziun Gustav Sonder, Salouf, per la lingua rumantscha e Renata Zala-Joos, Trimmis, per la lingua taliana. A partir da l'entschatta da november 2002 vegnan ussa er Paolo Spadaro, Savosa (TI) e Peider Andri Parli, Malix, ad entrar en il servetsch da translaziun; Spadaro per la lingua taliana e Parli per la lingua rumantscha. Uschia èsi reussì da survegnir persunas che disponan da la scolaziun basegnaivla e da l'experientscha per questa lavur pretensiusa.

La davosa plazza ch'igl è anc d'occupar en il servetsch da translaziun talian vegn publitgada anc ina giada.

Gremi: chanzlia chantunala dal Grischun
Funtauna: rg chanzlia chantunala dal Grischun