Tenor ils emprims resultats provisoris da la dumbraziun dal pievel 2000 muntan ils abitants dal Grischun a 187 800. En cumparegliaziun cun l'onn 1990 correspunda quai ad in augment da 14 000 persunas u dad otg pertschient. Tranter las regiuns dal chantun datti differenzas evidentas.
Da 1976 a 2000 è s'augmentà il dumber d'abitants en Svizra ed en Grischun per 16 pertschient. En il decurs dal temp è il svilup dentant stà different. Durant ils onns settanta han demussà la Svizra ed il Grischun in augment moderà dad 1.5 pertschient. Tranter 1980 e 1990 è l'augment da la populaziun stà bainquant pli intensiv. Cun 5.6 pertschient è il Grischun restà evidentamain sut la media naziunala dad 8 pertschient. Cuntrari è stà il svilup durant ils onns novanta: cun otg pertschient ha il Grischun demussà in augment cleramain pli aut che la Svizra (sis pertschient). Quai è in fatg tant pli remartgabel perquai che mo paucs chantuns han mussà in augment pli intensiv tranter 1990 e 2000 che durant il decenni passà.
Il svilup positiv dapi 1990 n'è dentant betg stà rectilign. Fin 1994 han chaschunà en emprima lingia grondas migraziuns in ferm augment da la populaziun. Davent da 1995 è stada la bilantscha da las migraziuns negativa ed er ils surplis da naschientschas èn regredids in pau. Per consequenza è il dumber d'abitants sa midà mo pli pauc durant la segunda mesadad dal decenni. Quest maletg sa cunfa cun il svilup naziunal. Suenter 1990 è l'augment succedì en emprima lingia en ils territoris rurals. Silsuenter è el sa spustà en ils territoris d'aglomeraziun.

In pau dapli persunas da l'exteriur
Il dumber da las estras e dals esters è s'augmentà dapi 1990 per var 3 000 sin circa 26 000. Lur quota en l'entira populaziun è s'augmentada levamain da 13.3 pertschient a 14 pertschient. La gruppa la pli gronda furman anc adina las persunas or d'Italia, schebain che lur quota è regredida da 34 sin 24 pertschient. Mintgamai circa mesas quotas da l'Italia demussan la Ex Jugoslavia, il Portugal e la Germania.

Paucas midadas en connex cun il stadi civil
47 pertschient da la populaziun è maridà, 43 pertschient nubil e sis pertschient vaiv. Tut questas cifras èn minimalmain pli bassas ch'avant diesch onns. Cumpensadas vegnan questas midadas tras in grond augment da la quota da persunas divorziadas, numnadamain da trais sin 4.5 pertschient. Perquai che la populaziun è creschida generalmain, correspunda quai ad in augment da las persunas divorziadas per dapli che la mesadad.

Differenzas regiunalas
Da las 15 regiuns han sis surpassà l'augment chantunal dad 8 pertschient. Augments da dapli che diesch pertschient han demussà las regiuns Engiadin'ota, Scanvetg, Valragn e Partenz. Mo in pitschen augment è resultà en Bergiaglia, a Tavau sco er en la Val Mesauc ed en il Puschlav. La Val Müstair e la Val Calanca han subì perditas da la populaziun. Las ulteriuras regiuns èn sa sviluppadas sumegliantamain a l'entir chantun.
Las plazzas da lavur tenor las dumbraziuns dals manaschis èn sa sviluppadas en diversas regiuns bainquant differentamain che la populaziun. In scleriment pli detaglià da questas differenzas vegnan a furnir las cifras dals pendularis, las qualas na stattan dentant anc betg a disposiziun.

Gremi: uffizi per economia e turissem
Funtauna: rg statistica