En il rom dal di svizzer dals archivs avran sonda, ils 16 da
november divers archivs chantunals ed archivs privats lur portas. Sut il
tema "l'actualitad dals archivs" ans fan els attents a lur impurtanza
sco memoria da la societad. Ils archivs ans transmettan noss'identitad.
En il Grischun avran l'archiv chantunal, l'archiv da la citad da Cuira,
l'archiv grischun per la cultura da las dunnas e la biblioteca
chantunala lur portas per la publicitad.
Giubileums u crisas mettan savens ils inventaris dals archivs
tuttenina en il center da l'attenziun. Uschia èsi capità per exempel tar
las retschertgas da las restanzas da l'aur rapinà dals Nazis, cur che
actas dal temp han survegnì tuttenina ina nova impurtanza. Archivs èn
mediaturs impurtants tranter il passà e l'avegnir: els han l'incumbensa
da rimnar gia oz quai che vegn dumandà puschmaun e da salvar quest bain
ch'el na giaja betg en emblidanza.
En il Grischun dat il proxim anniversari da 200 onns dal chantun la
chaschun da retschertgar en ils archivs: co patratgavan las Grischunas
ed ils Grischuns avant 200 onns davart l'adesiun da lur stadi liber a la
Confederaziun? Tge rapportavan las gasettas? Co sa manifestavan ils
process politics da quel temp en las actas? Curt: tge furmava
l'identitad grischuna u "The Heimat Feeling" dal 1803?
En ils archivs giran las preparativas per las festivitads da 200
onns cun tutta forza: l'archiv chantunal grischun elavurescha per il
mument da nov ses archiv helvetic dal temp dal 1798 - 1803. L'archiv da
la citad da Cuira furnescha per l'annala da giubileum da la Societad
historica funtaunas davart la vita da mintgadi a Cuira. L'archiv
grischun per la cultura da las dunnas prepara la publicaziun d'ina
collecziun da material commentada davart l'istorgia da las dunnas en il
Grischun. La basa per la collecziun da material che cumponan per
l'emprima giada funtaunas davart il "Heimat Feeling" da las Grischunas
en il 19. e 20. tschientaner furma l'inventari da la biblioteca
chantunala che posseda la pli gronda collecziun sistematica da las
publicaziuns grischunas.
L'archiv chantunal, l'archiv da la citad da Cuira, l'archiv grischun
per la cultura da las dunnas e la biblioteca chantunala sa preschentan
sonda, ils 16 da november cuminaivlamain a la publicitad. Il di svizzer
dals archivs ha lieu dapi il 1997 per la segunda giada e stat sut il
patrunadi da l'Associaziun da las archivaras e dals archivars svizzers
(AAS).
Temp d'avertura: 9.00 - 16.00
- L'archiv chantunal e la biblioteca chantunala: guids cuminaivels
ca. a las 11.30 ed a las 14.30
- Bibilioteca chantunala: exposiziun davart il tema "Bogns da cura
en il Grischun"; film documentar "Round about: Kreuz un quer durch
Graubünden" a las 10.00 ed a las 14.30
- Archiv da la citad: archivalias davart las fieras
- Archiv grischun per la cultura da las dunnas: guids a las 10.00 ed
a las 13.00
Gremi: archiv chantunal dal Grischun
Funtauna: rg archiv chantunal dal Grischun