La regenza ha approvà in'ulteriura cunvegna davart l'agid d'investiziun a la Viafier retica. La contribuziun chantunala importa 684'000.-- francs. Quests meds finanzials vegnan duvrads per la finanziaziun da l'indriz da regulaziun sco er per l'indriz da tragets bloccads tranter Favugn e La Punt-Tumein. La confederaziun surpiglia da sia vart 82 pertschient dals custs nets totals da 3,8 milliuns francs.

Contribuziuns chantunalas a diversas instituziuns
- Per lavurs da construcziun vi da la via da colliaziun Solas-Mut (tunnel Vallun da Mut) ha la regenza deliberà ina contribuziun da 1,1 milliuns francs.
- La regenza ha garantì ina contribuziun chantunala da radund 300'000.-- francs per la construcziun d'ina staziun da bus da duas varts vi da la Via taliana en il vitg da Domat, regiun "Plong Muling".
- Vi da la via dal Güglia duai vegnir construida a Vaz ina staziun per l'auto da posta. Per quest intent ha la regenza deliberà ina contribuziun chantunala da maximalmain 34'500.-- francs.

Da las vischnancas e regiuns
- La regenza ha approvà ils statuts da la vischnanca da Flearda. La vischnanca burgaisa als aveva gia approvads dal 1990 e supplitgà la regenza l'avust 2002 per ina approvaziun posteriura.
- Per engrondir e renovar il conduct d'aua / conduct da funtauna "Runca" - "Cuolm Selvadi" ha la regenza garantì a la vischnanca da Pitasch ina contribuziun chantunala da radund 117'000.-- francs.
- La regenza ha approvà a la vischnanca da Sursaissa ed a la corporaziun d'alp Vorderalp ina contribuziun chantunala da totalmain 84'000.-- francs. Cun quels raps vegn renovà ed engrondì il stabiliment dal provediment d'aua Vorderalp cun furniziun d'aua a la rait dal provediment d'aua Innertobel.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun